Ստամբուլի հայ համայնքի ներկայացուցիչները համայնքի ներսում ստեղծված ճգնաժամի լուծման համար հանդիպում են նշանակել

Ստամբուլի հայ համայնքի հիմնադրամների խորհրդի առաջնորդներն ու բարերարները Պոլսո հայոց պատրիարքարանի հոգեւոր խորհրդի առաջնորդ, եպիսկոպոս Սահակ Մաշալյանի հրաժարականի հետ կապված փետրվարի 16-ին հանդիպում են նշանակել։

Ինչպես տեղեկացնում է Ստամբուլի հայկական «Ակօս»-ը, Ստամբուլի հայ համայնքի Հիմնադրամների համերաշխության ու հաղորդակցության պլատֆորմի կողմից նախաձեռնված հանդիպմանը քննարկվելու է եպիսկոպոս Սահակ Մաշալյանի հրաժարականն ու պատրիարքի ընտրության հետ կապված ստեղծված ճգնաժամը հայ համայնքի ներսում։

Նշվում է, որ հանդիպմանը մասնակցելու են նաեւ հայ համայնքի ակտիվ ներկայացուցիչներ Հայկ Ասլանյանը, Զատիկ Թոքերը, Էրոլ Էրգանն ու Տիգրան Ալթունը։

Նշենք, որ օրեր առաջ Պոլսո հայոց պատրիարքարանի հոգեւոր խորհրդի առաջնորդ, եպիսկոպոս Սահակ Մաշալյանը հրաժարական էր ներկայացրել՝ այդ քայլին դիմելու համար մեղադրելով Պոլսո հայոց պատրիարքական տեղապահ արք․ Արամ Աթեշյանին։ Նա նշել էր, թե Աթեշյանն ամեն ինչ անում է, որ պատրիարքի ընտրություններ տեղի չունենան։

https://news.am/arm/news/373606.html