Թուրքիայի բնակչությունը արագորեն ծերանում է

Թուրք հոգեբույժ Սիբել Չաքըրն ահազանգել է, որ Թուրքիայի բնակչությունը արագորեն ծերանում է, իսկ ծեր բնակչությունը փակվում է տներում: Մասնագետի կարծիքով՝ Թուրքիան  առողջ և ակտիվ ծերացման ստրատեգիաներ մշակելու անհապաղ կարիք ունի:

Թուրքական «Ntv.com.tr» լրատվակայքի համաձայն՝  այս երկրի բնակչության 8.2 տոկոսը պատկանում է  65 տարեկանից բարձր տարիքային խմբին: Բացի այդ, տարեց բնակչության թիվը Թուրքիայում հետզհետե աճում է:

Պրոֆեսոր Չաքըրը նշել է, որ ողջ աշխարհում տարեց մարդկանց մոտ ինքնասպանության դեպքերը, մյուս տարիքային խմբերի համեմատ, 15 տոկոսով ավելի են:

«Վերջին տարիներին Թուրքիայում հատկապես մեծ թվով ինքնասպանություններ են գրանցվել 80-ից բարձր տարիքային խմբին պատկանող տղամարդկանց շրջանում: Դա ավելին է, քան որոշ եվրոպական երկրներում գրանցված ցուցանիշները»,- հավելել է նա:

Չաքըրի խոսքով՝ տղամարդիկ, կանանց համեմատ, ավելի քիչ են դիմում հոգեբանական օգնության, իսկ տարիքի հետ խնդիրներն ավելի են խորանում: Այդ պատճառով էլ ծերանալուն զուգընթաց տղամարդկանց մոտ ինքնասպանության դեպքերը, կանանց համեմատ, հետզհետե ավելի հաճախակի են դառնում:

http://www.ermenihaber.am/am/news/2017/02/14/%D4%B9%D5%B8%D6%82%D6%80%D6%84%D5%AB%D5%A1/99211