Թուրքիայի իշխող Արդարություն և զարգացում կուսակցության (AKP-ԱԶԿ) պատգամավոր Մուստաֆա Եներօղլուն Բուրսա քաղաքում ներկայացրել է Թուրքիա–թուրքական սփյուռք խնդիրները: Այս մասին տեղեկացնում է «Dünyabulteni» լրատվական կայքը:
Ըստ Ermenihaber-ի՝ «Էմիգրանտի ընկալումից դեպի Սփյուռք. արտերկրում բնակվող թուրքերի քաղաքականությունը» խորագրով հանդիպման ժամանակ Եներօղլուն խոսել է համայնքների և իրենց հայրենի երկրի վրա նրանց ազդեցության մասին: Նրա կարծիքով՝ ժամանակակից աշխարհում, որտեղ սահմաններն աստիճանաբար կորցնում են իրենց նշանակությունը, իսկ մարդիկ ավելի հեշտությամբ ու հաճախականությամբ են փոխում իրենց բնակության վայրը, ամենակարևոր ուժերից մեկը, անկասկած, սփյուռքն է դարձել:
«Սխալ չի լինի, եթե սփյուռքը դիտարկենք որպես երկիրն առաջ մղող, երբեմն էլ երկրի տնտեսությունը փրկող, անգամ հայրենիքն ուղղորդող, քաղաքականությունը որոշող ուժ»:
Ըստ Եներօղլուի՝ այդպիսի սփյուռքի հաջողված օրինակ է հայկական սփյուռքը: Բանախոսի խոսքերով, հայկական սփյուռքն իր պետությունից ավելի հզոր է և այդպիսով՝ Հայաստանի քաղաքականության վրա որոշիչ ազդեցության ունի: Որպես հաջողված սփյուռքի օրինակ` նա նշել է նաև հրեական սփյուռքը:
Անդրադառնալով Թուրքիային և թուրքական սփյուռքին՝ Եներօղլուն դժգոհել է, որ Թուրքիան չի օգտագործում արտերկրում բնակվող թուրքերի ներուժը, ավելին` անգամ որպես սպառնալիք է ընկալում նրանց: Սակայն, ըստ նրա, արդեն սկսել են հասկանալ սփյուռքի թե՛ դերը և թե՛ կարևորությունը:
Leave a Reply