Մի պահ մոռացե՛ք այն ամենը, ինչ ձեզ սովորեցրել են, նայե՛ք այս աչքերին. թուրք լրագրողը Ծիծեռնակաբերդի բարձունք այցելության մասին

Թուրք լրագրող, սյունակագիր, CNN-ի թուրքական ծառայության համախմբագիրներից մեկն ու Ստամբուլի հայկական պարբերականներից «Ակօսի» նախկին աշխատակից Սերդար Քորուջուն Mylittleworldtour.com կայքում Հայաստանի և Արցախի տեսարժան վայրերի մասին պատմող իր հոդվածաշարում անդրադարձել է Հայոց ցեղասպանության զոհերի հուշահամալիր այցելությանն ու որպես թուրք և Թուրքիայի քաղաքացի այնտեղ ունեցած զգացողություններին:

«Ի՞նչ է սպասվում ձեզ ներսում: Եկեք մենք չասենք: Գնացեք, ինքներդ տեսեք: Կարդացեք մարդկային պատմությունները, նայեք լուսանկարներում գտնվողների աչքերին, դեմքերին: Դրանից հետո բարձրացեք դեպի հուշակոթող: Մի պահ կտրվեք ամեն ինչից: Ձեր լսած, կարդացած և սովորած ամեն ինչից: Միայն փորձեք ձեզ զգալ այն մարդկանց դիմաց կանգնած, որոնք լինելով Օսմանյան կայսրության քաղաքացիներ՝ իրենց իսկ հայրենիքում կոտորվել, Սիրիայի անապատները քշվելով` ոչնչացվել են միայն նրա համար, որ հայ էին: Պատկերացրեք կանանց, երեխաներին, ծերերին: Պատկերացրեք, որ նրանց հուշերի մոտ եք եկել: Եվ մի մոռացեք, որ այդտեղ վառվող կրակը ոչ միայն հուշակոթողի մեջտեղում, այլև հարազատ կորցրած ամեն ընտանիքի սրտում է վառվում: Մի քանի մեխակ դրեք` բավական է: Համենայնդեպս, առաջին այցելության համար բավարար է…», – գրել է Քորուջուն:

Իր նախորդ հոդվածներից մեկում Սերդարը նշել էր, որ եթե մարդիկ կարողանան հաղթահարել իրենց գլխում եղած փոքրիկ «սահմանները»` Հայաստանի և Թուրքիայի միջև դիվանագիտական հարաբերությունների հաստատումն այդքան էլ էական չէ:

«Շատ կներեք, հավանեք, թե չհավանեք, հավատաք, թե չհավատաք, իմանաք, թե չիմանաք՝ Հայոց ցեղասպանությունն այս երկրում մի վերք է», – գրել էր Քորուջուն իր բլոգում:

http://www.tert.am/am/news/2017/02/09/serdar-korucu/2273457