Թուրքիայում կրկին ընդդիմադիր քուրդ պատգամավոր է բերման ենթարկվել

Թուրքիայում ոստիկանությունը բերման է ենթարկել քրդամետ Ժողովուրդների դեմոկրատական կուսակցության (HDP-ԺԴԿ) պատգամավոր Լեյլա Զանային:

Թուրքական իշխանամետ «Sabah» թերթի կայքը տեղեկացնում է, որ Զանայի դեմ Դիարբեքիրի հանրապետական դատախազությունը «զինված ահաբեկչական կազմակերպությանն անդամակցելու» մեղադրանքով հետաքննություն է սկսել:

Դատախազությունը Զանային ծանուցում է ուղարկել` ներկայանալու գործի առնչությամբ ցուցմունք տալու համար: Քանի որ պատգամավորը չէր ներկայացրել դատախազություն, նրան բերման ենթարկելու որոշում է կայացվել:

Հիշեցնենք, որ 2016թ. նոյեմբերի սկզբին բերման էին ենթարկվել  ԺԴԿ-ի 11 պատգամավոր, որոնցից 9-ը, այդ թվում կուսակցության համանախագահներ՝ Սելահաթթին Դեմիրթաշը և Ֆիգեն Յուքսեքդաղը, կալանավորվել էին:

Նրանց կալանավորումից հետո բերման են ենթարկվել կամ ձերբակալվել են ԺԴԿ-ն ներկայացնող պատգամավորներ, տեղական ինքնակառվարման ղեկավարներ:

http://www.ermenihaber.am/am/news/2017/02/08/%D4%B9%D5%B8%D6%82%D6%80%D6%84%D5%AB%D5%A1%D5%B6-%D4%BA%D4%B4%D4%BF/98903