Թուրքիայում Աբդուլ Համիդի թոռնուհին պահանջում է պապի կալվածքները՝ մասնավորապես պոլսահայ Բալյաններին պատկանած կղզին

Օսմանյան սուլթան Աբդուլ Համիդի թոռ Նիլհան Օսմանօղլուն պահանջել է իր պապին պատկանած տարածքներից Գալաթասարայի կղզին և հայտարարել, որ իր ընտանիքին պատկանած 32 տարածք, որոնք հիմնականում գտնվում են Ստամբուլի տարածքում, անօրինական կերպով խլվել են իրենցից կայսրության տապալումից և Թուրքիայի Հանրապետության հռչակումից հետո:
Ինչպես գրում է թուրքական «Բիրգյուն» պարբերականը՝ Նիլհանը նաև ակտիվորեն աջակցում է Թուրքիայի նախագահ Ռեջեփ Թայիփ Էրդողանին՝ սահմանադրական փոփոխությունների հարցում:
Օսմանօղլուն հեռուստատեսային հաղորդումներից մեկի ժամանակ հայտարարել է, որ անհրաժեշտության դեպքում դատարանի միջոցով հետ կստանա «իր նախնիների ունեցվածքը» և քննադատել է Թուրքիայում Աթաթուրքի իրականացրած բարեփոխումներն ու հայտարարել, որ հանրապետության հռչակմամբ Թուրքիայում ջնջվել է անցյալը, մոռացվել կրոնն ու օսմանյան լեզուն:
Երբ հեռուստաալիքի հաղորդավարը հանդիմանել է Օսմանօղլուին՝ նշելով, որ Թուրքիայի Հանրապետության հիմնադիր և առաջին նախագահ Մուստաֆա Քեմալ Աթաթուրքն ու իր թիմակիցներն արևմտյան արժեքներին համապատասխան հասարակարգ են ստեղծել և բարձրացրել կրթության մակարդակը, այն դեպքում, երբ օսմանյան շրջանում կրթված բնակչության տոկոսը չէր հասնում անգամ մեկի, Օսմանօղլուն քամահրանքով պատասխանել է. «Փառք Աստծո, որ այդպես մտածող երիտասարդները գնալով քչանում են մեր երկրում»:
Ավելի վաղ Թուրքիայի ընդդիմադիր Ժողովրդահանրապետական կուսակցության անդամ, Մանիսայից ընտրված պատգամավոր Օզգյուր Օզելը խիստ քննադատության է ենթարկել Նիլհան Օսմանօղլուին, որն իր աջակցությունն էր հայտնել երկրում կառավարման նախագահական համակարգի անցմանը:
«Տիկինը հարուստ, ճոխ պայմաններում նստել, խոսում է: Սրան տեսեք: Տիկին Նիլհանն էլ լավ գիտի, որ իր պապը Մեջլիսի թշնամին էր: Քո պապը պատմության մեջ ամենաշատ հող կորցրած սուլթանն է: Կիպրոսը տվեց անգլիացիներին՝ առանց պատերազմելու: Էգեյան ծովի բոլոր կղզիները կորցնողն էլ նրա պապն է: Հիմա դու Աթաթուրքի դե՞մ ես լեզու երկարացնում, այդ դեպքում իմացիր, որ եթե Աթաթուրքը չլիներ, դու էլի կապրեիր, իհարկե: Բայց կապրեիր հսկա պալատի այն սենյակում, որտեղ հայրդ կամ պապդ հարմար կգտներ ու ով գիտի՝ որ փաշայի որերորդ կինը կլինեիր», – ասել է պատգամավորը:
Ի դեպ, Գալաթասարայի կղզին, որի հանդեպ հավակնություններ է ներկայացնում Նիլհան Օսմանօղլուն, դեռևս 1872թ. օսմանյան սուլթաններից Աբդուլազիզի կողմից շնորհվել է հայտնի պոլսահայ Բալյանների (օսմանյան պատմության ամենանշանավոր ճարտարապետների ընտանիքներից մեկը) տոհմի ներկայացուցիչներից Սարգիս Բալյանին: