Ստամբուլի հայկական Կենտրոնական վարժարանը պոլսահայ համայնքի կողմից ռեկորդային նվիրատվություն է ստացել

Ստամբուլի հայկական Կենտրոնական վարժարանը ստամբուլահայ համայնքի բարերարների կողմից ռեկորդային նվիրատվություն է ստացել: Այս մասին գրում է Ստամբուլի հայկական պարբերականներից «Ակօսը»:

Նախօրեին դպրոցի բյուջեի պակասորդը լրացնելու համար կազմակերպված բարեգործական ընթրիքի ժամանակ  1 մլն 530 հազար թուրքական լիրայի (մոտ 390 000 ԱՄՆ դոլար) հասնող պակասորդը փակել հաջողվել է մասամբ:

Ընթրիքի ընթացքում Պոլսո Հայոց փոխպատրիարք Արամ Աթեշյանը հայտնել է, որ բարերարների կատարած հանգանակության շնորհիվ հավաքվել է ռեկորդային քանակությամբ նվիրատվություն՝ 900 000 թուրքական լիրա, իսկ բյուջեի մնացյալ բացը կփակվի համայնքային հիմնադրամների համապատասխան աշխատանքի արդյունքում:

Նշենք, որ Ստամբուլում գործում է 16 հայկական վարժարան, որոնցից 13-ը մասնավոր են, 3-ն էլ համարվում են համայնքի ընդհանուր սեփականությունը: Այս դպրոցներում կարող են սովորել միայն հայ քրիստոնյա ընտանիքի զավակները` ներկայացնելով նախ մկրտության թուղթ: Դա կապված է նրա հետ, որ Թուրքիայի Հանրապետության օրենսդրության համաձայն՝ երկրի բոլոր քաղաքացիները պաշտոնապես թուրք են համարվում, իսկ հայերը, հույները և հրեաները համարվում են կրոնական փոքրամասնություն: Ըստ Լոզանի պայմանագրի` կրոնական փոքրամասնություն համարվելու շնորհիվ հայերն իրավունք են ստացել սովորելու իրենց մայրենին, ինչից զրկված են քրդերը, զազաները, չերքեզներն ու լազերը:

Թուրքիայի հայկական վարժարանների մեծ մասը գոյատևում է համայնքի տարբեր բարերարների նվիրատվությունների հաշվին, դրա հետ զուգահեռ՝ դպրոցներ հաճախող հայ աշակերտների թիվն ամեն տարի նվազում է: Դա կապված է թե՛ Կ. Պոլսի հայ համայնքի արտագաղթի, թե՛ վարժարանների ուսման բարձր վարձավճարների հետ (Ստամբուլի հայկական վարժարանների ուսման վարձերը կազմում են տարեկան միջինը 3000 դոլար):

http://www.tert.am/am/news/2017/02/02/gentronagan-istanbul/2266470