Այո՛, ընդունում եմ, բայց շատ բան չգիտեմ դրա մասին. թուրք երիտասարդը Հայոց ցեղասպանության մասին

Իզմիրցի լուսանկարիչ 22-ամյա Բեքիր Արմե Օգյուտը Հայաստան է եկել «Կամրջելով պատմությունները» ծրագրի շրջանակներում, նախ եղել է Դիլիջանում, հետո՝ Երևանում:  Tert.am-ի հետ զրույցում նա նշեց, որ հայտնի հայերից էլ ճանաչում է Արտո Թունջբոյաջյանին, իսկ այն համալսարանում, որտեղ սովորում է, ազգությամբ հայ ընկեր ունի:
«Ես նաև ճանաչում եմ Թուրքիայի Մեջլիսի հայ պատգամավորներին, սակայն նրանցով չեմ հետաքրքրվում, քանի որ քաղաքականությունն ինձ համար զզվելի է: Հայերի հետ շփվելու ոչ մի խնդիր չունեմ»,- ասաց նա:
Նշենք, որ նա ընդգրկվել է Հայաստանում ԱՄՆ դեսպանատան հովանու ներքո կազմակերպած «Կամրջելով պատմությունները» ծրագրին, որի ընթացքում հայ և թուրք ֆոտոլրագրողները մասնակցել են դասընթացի և դրա շրջանակներում լուսանկարներ արել իրենց բնակավայրերում: Ծրագրի ավարտն էլ նշանավորվել է նրանց աշխատանքների ցուցահանդեսով:
Թուրք լուսանկարչի խոսքով՝ հիմա Հայաստանում է, քանի որ կարծում է, որ հայ և թուրք ժողովուրդների միջև պետք է հարաբերությունները լավանան: Նա նշեց, որ Թուրքիայում Հայաստանի մասին շատ քիչ են խոսում:
«Մենք չենք խոսում Հայաստանի, Հայոց ցեղասպանության մասին, որովհետև թուրքերը չեն ցանկանում այն ընդունել: Ես չգիտեմ դրա մասին, ես դրանով հետաքրքրված չեմ, ես 22 տարեկան եմ և չեմ ցանկանում սպանել որևէ մեկին: Ես այդպես եմ մտածում»,- ասաց նա:
Միևնույն ժամանակ թուրք երիտասարդը պատմեց, որ երբ ծնողներին ասել է, թե ցանկանում է դիմել այդ ծրագրին և գնալ Հայաստան, նրանք բացարձակապես դեմ չեն եղել:
Հարցին, թե ընդունո՞ւմ է Հայոց ցեղասպանությունը, նա պատասխանեց․ «Այո՛, ընդունում եմ, բայց շատ բան չգիտեմ դրա մասին, գիտեմ այն, ինչ կա Վիքիպեդիայում: Չգիտեմ… ես չեմ ցանկանում այդ մասին խոսել, ես չունեմ ոչ մի տեղեկատվություն դրա մասին»:

http://www.tert.am/am/news/2017/01/26/beqir/2259975