Հրանտ Դինքի յիշատակի ոգեկոչում վիրահայոց թեմում

2007 թուականի յունուարի 19ին, Ստամբուլում նենգաբար սպաննուեց տեղի «Ակօս» երկլեզու շաբաթաթերթի գլխաւոր խմբագիր Հրանտ Դինքը: Մեծ հայրենասէրի ողբերգական մահուան 10րդ տարելիցի կապակցութեամբ Թուրքիայում, Հայաստանում եւ Հայկական Սփիւռքում կազմակերպուեցին տարբեր միջոցառումներ: Անմասն չմնաց թբիլիսահայ համայնքը՝ Վիրահայոց թեմի գլխաւորութեամբ:

2017 թուականի Յունուարի 21ին, Թբիլիսիի Սուրբ Էջմիածին եկեղեցում, Վիրահայոց թեմի առաջնորդ Վազգէն եպիսկոպոս Միրզախանեանի նախագահութեամբ կատարուեց Հրանտ Դինքի հոգեհանգստեան պաշտօն, որին ներկայ էին Վրաստանում ՀՀ դեսպանութեան դիւանագէտները, համայնքային կառոյցների ղեկավարներ, մտաւորականներ, հաւատացեալներ:

Հրանտ Դինքի յիշատակի ոգեկոչմանն էր նուիրուած թուրք լուսանկարիչ Ումուտ Վեդատի «Ո՞վ եմ ես» խորագրով լուսանկարչական աշխատանքների ցուցահանդէսը, որը բացուեց Վիրահայոց թեմի «Հայարտուն» կենտրոնի «Գալուստ Կիւլպէնկեան» սրահում:

Լքուած շինութիւններ, ամայացած գիւղեր ու քաղաքներ, փլատակուած վանքեր ու տաճարներ արտացոլող լուսանկարները բարձրաձայնում են ճշմարտութիւնը, ցոյց տալիս Հայոց Ցեղասպանութեան հետքը, որն այնպէս ջանադրաբար ձգտում է մոռանալ ու վերացնել թուրքական պետութիւնը: Ցուցադրուած նկարներից ամէն մէկը հայոց պատմական հայրենիքի տարբեր շրջանների ողբերգական պատմութեան մի դրուագ է:

Ցուցահանդէսի բացմանը ներկայ էին հեղինակը՝ թուրք լուսանկարիչ Ումուտ Վեդատը, թուրքահայ Մուրադ Ալուչլուն, գրող Իրակլի Կակաբաձէն, ռեժիսոր Մալխազ Կուխիանիձէն, Վիրահայոց թեմի առաջնորդը, Վրաստանում ՀՀ դեսպանութեան դիւանագէտներ, տարբեր ազգերի մտաւորականներ, արտասահմանցի հիւրեր:

Բացելով ցուցահանդէսը, «Հայարտուն» կենտրոնի ղեկավար Լեւոն Չիդիլեանը շնորհակալութիւն յայտնեց Ումուտ Վեդատին՝ թուրքական իշխանութիւնների վերաբերմունքը արհամարհելու, ցեղասպանութեան թեման բարձրաձայնելու, նաեւ Հրանտ Դինքի յիշատակը այս ցուցահանդէսով խնկարկելու համար:

Ումուտ Վեդատը անդրադարձ կատարելով Հրանտ Դինքի յիշատակին, խօսեց Թուրքիայում խօսքի ազատութեան, Հայոց Ցեղասպանութեան թեմաների եւ լուսանկարների միջոցով արդարութեան ձայնը լսելի դարձնելու, հայերի դէմ թուրք ազգայնամոլների գործած ոճրագործութիւնները սերունդներին հասանելի դարձնելու իր նպատակի մասին:

Նենգաբար սպաննուած Թուրքիայի քաղաքացի Հրանտ Դինքը մտահոգուած էր թուրքերի եւ հայերի միջեւ հաշտութիւն հաստատելու հարցով, գործում էր Թուրքիայի ժողովրդավարացման, խօսքի ազատութեան, մարդու իրաւունքների եւ յատկապէս Թուրքիայում ապրող հայ համայնքի իրաւունքների մասին եւ սա էր մեծ ժողովրդասերի, արդարութեան խօսքի ջատագովի հաւատոյ հանգանակը:

Ահա այս մասին իրենց ելոյթներում կարեւորեցին գրող Իրակլի Կակաբաձէն, «Վրաստան» թերթի խմբագիր Վան Բայբուրթեանը, «Խաղաղութեան հիմնադրամ»ի նախագահ Գիորգի Թումասեանը, Վրաստանում ՀՀ դեսպանութեան խորհրդական Կարէն Մելիքեանը, «Ալիքմեդիա» օնլայն հայերէն լրատուամիջոցի գլխաւոր խմբագիր Արսէն Խառատեանը:

Վիրահայոց թեմի առաջնորդ Վազգէն եպիսկոպոս Միրզախանեանն իր օրհնութեան եւ գնահատանքի խօսքում անդրադարձ կատարեց Հրանտ Դինքի ապրած կեանքին եւ գործունէութեանը, կիսեց արժանաւոր հայորդու ազատամտութիւնը, ժողովրդավարական գաղափարները, պայքարը ազգայնամոլութեան եւ ճշմարտութեան խեղաթիւրման դէմ:

Հրանտ Դինքի յիշատակի ոգեկոչմանը նուիրուած ցուցահանդէսը նաեւ բողոք էր Հայոց Ցեղասպանութեան կազմակերպիչների դէմ, նաեւ Թուրքիայում հայկական հոգեւոր եւ մշակութային ժառանգութիւնը պահպանելու պահանջ: Ցուցահանդէսը կը շարունակուի եւս երկու շաբաթ:

ՀԱՅ ԱՌԱՔԵԼԱԿԱՆ

ՈՒՂՂԱՓԱՌ

ՍՈՒՐԲ ԵԿԵՂԵՑՈՒ

ՎԻՐԱՀԱՅՈՑ ԹԵՄ

Asbarez.com