«Հրանտ Դինքի կերպարը համախմբում է համայն հայությանը». Ռուբեն Սաֆրաստյան

Հունվարի 19-ին ՀՀ սփյուռքի նախարարության նախաձեռնած «Հրանտ Դինք.10 տարի անց» խորագրով կլոր սեղան–քննարկման ժամանակ ՀՀ ԳԱԱ արևելագիտության ինստիտուտի տնօրեն, թուրքագետ Ռուբեն Սաֆրաստյանը հանդես եկավ «Հրանտ Դինքը՝ որպես գործիչ և անհատականություն» թեմայով զեկույցով:

Ռուբեն Սաֆրաստյանը շնորհակալություն հայտնեց ՀՀ սփյուռքի նախարարությանը հիշատակի միջոցառումը կազմակերպելու համար՝ նշելով, որ այս նախաձեռնության միջոցով հնարավորություն են ունենում մեկ անգամ ևս հասկանալու և իմաստավորելու Հրանտ Դինք երևույթը:

«Տաս տարին այնպիսի ժամանակահատված է, որի ընթացքում կարողանում ենք մեր տպավորություններն ամփոփել այս անձնավորության շուրջ, վերարժևորել և հասկանալ, թե ո՞վ է Հրանտ Դինքը, ինչո՞ւ պայքարեց բոլորիս համար, ինչո՞ւ սպանվեց:

Նրա պայքարն առաջին հերթին իր ինքնության, հայի ինքնության հիմնարար բացահայտման համար էր, որպեսզի կարողանար արտահայտել ժամանակակից Թուրքիայում ապրող մարդուն հատուկ մտքերը: Դինքը մինչև կյանքի վերջը չդադարեց մաքառել հանուն իր ժողովրդի և արդարության: Հենց այստեղ է երևում  նրա մեծությունն ու նվաճումը: Հրանտ Դինքի կերպարը համախմբում է համայն հայությանը: Զոհաբերելով իր կյանքը՝ նա ճանապարհ հարթեց ապագայի համար:»,-«Հայերն այսօր»-ի փոխանցմամբ ասաց թուրքագետը՝ հավելելով, որ Դինքն ամենայն վճռականությամբ է պայքարի նետվել, ինչպես նա էր ասում՝ միշտ պայքարի կիզակետում էր գտնվում:

Ռուբեն Սաֆրաստյանը Թուրքիայում ամենահայտնի հայ լրագրողի կյանքից մի դրվագ հիշեց. «Հրանտ Դինքը Պոլսի «Մարմարա» օրաթերթում հոդվածներ գրելու ժամանակ «Ջութակ» ծածկանունով է ներկայացել. ջութակը մարդու վրա ամենամեծ ազդեցություն ունեցող երաժշտական գործիքներից է համարվում: Այսինքն, նա փորձում էր ներազդել մարդկանց վրա, բազմությանը տանել իր հետևից, բայց դարձավ «վախվորած աղավնի», որը սպանվեց»:

Թուրքագետը հիշեց նաև 2003 թ. Դինքի հետ ունեցած իր հանդիպումը, որտեղ վերջինս ասել էր, որ իրեն սպանելու են: Նա կարծես կանխազգում էր իր մահը:

Զեկույցի վերջում Ռուբեն Սաֆրաստյանն անդրադարձավ Թուրքիայի մեջլիսի հայ պատգամավոր Կարո Փալյանին. «Վստահ կարող ենք ասել, որ Հրանտ Դինքի գործն այսօր Կարո Փալյանն է շարունակում: Երբ այս կլոր-սեղան քննարկման զեկույցն էի պատրաստում, մի լուսանկար գտա, որտեղ Կարո Փալյանը Դինքի հուղարկավորության ժամանակ ձեռքում «Մենք բոլորս հայ ենք, մենք բոլորս Հրանտ Դինք ենք» վերտառությամբ լուսանկարն էր պահել. շատ ազդեցիկ էր: Նշեմ նաև, որ Կարո Փալյանը լրագրողական առաջին քայլերը հենց «Ակօս» թերթում է սկսել՝ Հրանտ Դինքի ղեկավարությամբ»:

Գևորգ Չիչյան

http://hayernaysor.am/archives/229271