Էրդողանն ավելի հստակություն է մտցրել Պոլսո պատրիարքի ընտրությունների ժամկետի հարցում․ Արա Գոչունյան

Թուրքիայի նախագահ Ռեջեփ Թայիփ Էրդողանի հետ Սուրբ Փրկիչ հայկական հիվանդանոցի հոգաբարձուների խորհրդի նախագահ Պետրոս Շիրինօղլուի հանդիպումն ավելի հստակություն է մտցրել Պոլսո պատրիարքի ընտրություններն անցկացնելու ժամկետի հարցում. Tert.am-ի հետ զրույցում այսպես ասաց Ստամբուլում հրապարակվող «Ժամանակ» թերթի խմբագիր Արա Գոչունյանը, ով Պետրոս Շիրինօղլու հետ խոսել է անմիջապես Էրդողանի հետ նրա հանդիպումից հետո:
«Անցած հուլիսի 15-ից՝ հեղաշրջման փորձից հետո, Թուրքիայում բոլոր պետական մարմինները սպասողական վիճակում են: Հետևաբար` այդ իրավիճակում ազգային փոքրամասնությունների վերաբերյալ որոշումներն էլ են հապաղում, մեր դեպքում՝ Պոլսի պատրիարքարանի ընտրություններն են»,- ասաց նա՝ նշելով, որ Թուրքիայի նախագահը խոսելով պատրիարքարանի ընտրություններից՝ արդեն գործընթացն առաջ է տարել: Նշենք, որ Էրդողանը հանդիպման ժամանակ ասել է, որ պատրիարքարանի ընտրությունները տեղի կունենան սահմանադրական փոփոխությունների հանրաքվեից հետո:
Արա Գոչունյանի խոսքով՝ Էրդողանի խոսելուց հետո արդեն նահանգապետարան դիմում ներկայացնելը ձևական բնույթ է կրելու: «Հիմա հանրապետության նախագահի մակարդակով այդ հարցը քննարկելը, քաղաքական կամք դրսևորելը արդեն լուրջ բան է նշանակում»,- ասաց նա՝ նշելով, որ նշմարվում է՝ ընտրությունները գուցե լինեն գարնանը:
Պատրիարքարանի ընտրությունների հստակ ամսաթվի անհայտ մնալն այս պահի դրությամբ, ըստ նրա, խնդիր չէ: Դիտարկմանը, թե Թուրքիայի նախագահը «Սահմանադրական փոփոխությունների հանրաքվեից հետո պատրիարքի ընտրությունները կանցկացվեն» ասելով, գուցե մի քանի տարի հետո է նկատի ունեցել, Արա Գոչունյանը պատասխանեց․ «Դուք քանի որ այստեղի մթնոլորտը չեք շնչում, բնականաբար, Ձեր ասածը ճիշտ է, բայց երբ որ հանրաքվեից հետո խոսվում է այնպիսի մի գործընթացի մասին, նամանավանդ որ հարցն այս կարգի սպասողական վիճակում է, ութ տարի է դրան են սպասում, իմաստն այն է, որ գործընթացն առաջ անցնի»,- ասաց նա:
Դիտարկմանը, թե շատերը խոսում են, որ պատրիարքի ընտրություններում հաղթանակ կտանի Թուրքիայի նախագահ Էրդողանի նախընտրած թեկնածուն՝ Արա Գոչունյանը պատասխանեց․ «Դրանք շատ մակերեսային խոսակցություններ են: Ամեն անգամ պատրիարքի ընտրությունների ժամանակ պառակտումներ են լինում համայնքում: Ավելի գերակշիռ ձայն ունեցող կողմին մաշելու համար ասում են, թե պետության թեկնածուն է: Փաստը մնում է փաստ, որ ավելի քան 550 տարվա պատմություն ունի մեր Պոլսո պատրիարքական աթոռը, և ցանկացած մեկը, թեկնածուներից անգամ ամենաարմատականը եթե պատրիարքական աթոռին բազմի, պարտավոր է Թուրքիայի իշխանությունների հետ նորմալ աշխատել: Դա բխում է մեր համայնքի շահերից: Չի կարելի երևակայել, որ Պոլսո պատրիարքը չպետք է ներդաշնակ հարաբերություններ ունենա Թուրքիայի Հանրապետության  իշխանությունների հետ»:

http://www.tert.am/am/news/2017/01/23/Ara/2256866