Պատմական Խարբերդի Սուրբ Գևորգ հայկական եկեղեցին կործանման եզրին է

Թուրքիայի Էլյազըղ (պատմական Խարբերդ) նահանգի Շահինքայա գյուղում գտնվող հայկական Սուրբ Գևորգ վանական համալիրը կործանման եզրին է, այս մասին գրում է թուրքական DİHABER գործակալությունը:

Հայտնի է, որ մոտ 1500 տարվա պատմություն ունեցող վանական համալիրը երիտթուրքերի ժամանակաշրջանից մինչ այսօր պարբերաբար ենթարկվում է գանձագողերի հարձակումներին ու ավերածություններին:

Շահինքայա գյուղի բնակիչների պնդմամբ՝ դեռևս 20 տարի առաջ վանքի պատերին առկա են եղել մեծ խաչեր և ձիավոր սրբի պատկեր, դրանք 1990-ականներին ոչնչացվել են անհայտ անձանց կողմից:

Նշվում է, որ Թուրքիայի շրջակա միջավայրի և մշակութային ժառանգության պահպանության հիմնադրամը 35 տարի առաջ Սուրբ Գևորգ վանքի և շրջակա տարածքի պահպանմանն ուղղված հայտ է ներկայացրել իշխանություններին, ինչի արդյունքում վանական համալիրը հաշվառման տակ է առնվել նահանգապետարանի կողմից, սակայն կառույցի պահպանմանն ուղղված որևէ աշխատանք այստեղ այդպես էլ մինչ օրս չի իրականացվել:

http://www.tert.am/am/news/2017/01/16/surp-kevork-elazig/2249994