Ցեղասպանություն իրագործողը ոչ թե թուրք ժողովուրդն է, այլ միշտ հանցանք գործող ու երբեք չպատժվող այս մտայնությունը. Փայլան

Սահմանադրական փոփոխությունների վերաբերյալ մեջլիսում քննարկումների ժամանակ ազգային փոքրամասնությունների իրավունքների մասին ելույթ ունենալիս Թուրքիայի քրդամետ Ժողովուրդների դեմոկրատական կուսակցության՝ ազգությամբ հայ պատգամավոր Կարո Փայլանն անդրադարձել է նաև Հայոց ցեղասպանությանը:

Նա 1915 թ. իրադարձությունները «ցեղասպանություն» է անվանել, ինչը հարուցել է Էրդողանի Արդարություն և զարգացում, ընդդիմադիր Ժողովրդահանրապետական, ինչպես նաև Ազգային շարժում կուսակցությունների պատգամավորների զայրույթը:

Նրանք պահանջել են դադարեցնել նիստը, ապա՝ դատապարտել Փայլանի հայտարարությունները:

Ընդմիջումից հետո նիստերի դահլիճ վերադարձած էրդողանամետ և ընդդիմադիր պատգամավորները զավեշտալի որոշում են կայացրել, համաձայն որի` Փայլանը, որպես «պատիժ», կզրկվի երեք նիստի մասնակցության իրավունքից:

Փայլանի մասին ընդունված ամոթալի որոշումից հետո ԺԴԿ անդամները Փայլանի հետ լքել են նիստերի դահլիճը:

Այս միջադեպից հետո Փայլանն իր թվիթերյան էջում գրառում է կատարել, որում մասնավորապես ասվում է.  «Ցեղասպանություն իրագործողը ոչ թե թուրք ժողովուրդն է, այլ միշտ հանցանք գործող ու երբեք չպատժվող այս մտայնությունը»:

http://www.yerkir.am/news/view/120948.html