Եթե այս շաբաթ էլ Ստամբուլի նահանգապետարանը չընդունի մեր պատվիրակությանը, պատրիարքի ընտրության մասին նամակը կհանձնվի այլ միջոցով. Աթեշյան

Պոլսո Հայոց պատրիարքարանն այդպես էլ չի ստացել Ստամբուլի նահանգապետարանի կողմից ընդունելության ամսաթվի վերաբերյալ պաշտոնական պատասխանը: Ակնկալվող հանդիպմանը Պոլսո Հայոց նոր պատրիարքի ընտրությունների հետ կապված պատրիարքարանին կից հանձնաժողովը պետք է նահանգապետարանին ներկայացներ ընտրություններ անցկացնելու վերաբերյալ եկեղեցական խորհրդի որոշումն ու հստակեցներ ընտրությունների անցկացման ժամկետները:

Պոլսո Հայոց պատրիարքի փոխանորդ Արամ Աթեշյանի խոսքով՝ նահանգապետարանը չի կարողացել պաշտոնական պատասխան հղել պատրիարքարանին «չափից դուրս խիտ գրաֆիկի պատճառով»:

Սուրբծննդյան տոնին իր շնորհավորական խոսքում Աթեշյանն, անդրադառնալով համայնքին հուզող խնդրին, նշել էր, որ եթե նահանգապետարանի պատասխանն ուշանա, իրենք նամակը կփոխանցեն առանց ընդունելության սպասելու:

«Եթե այս շաբաթ էլ որևէ զարգացում չլինի` կդիմենք այլ միջոցի: Մեր պատրաստած դիմում-նամակն առանց հանդիպման ուղիղ կհանձնենք նահանգապետարանին»,- ասել է Աթեշյանը:

Ինչպես փոխանցում է «Ակօսը»` ենթադրվում է, որ պատրիարքարանի ներկայացուցիչները դիմում-նամակը նահանգապետարանին կհանձնեն մոտ օրերին:

«Մինչդեռ դիմում-նամակի վերաբերյալ համայնքի ներսում դեռևս մի շարք անպատասխան հարցեր կան: Մասնավորապես, թե ինչ ձևակերպումներ է պարունակում դիմումը, այնտեղ ընտրություն անցկացնելու համար թույլտվություն են խնդրում, թե պարզապես ակնկալում հստակեցնել ընտրության անցկացման ամսաթիվը», – եզրափակում է պարբերականը:

Հիշեցնենք, որ Պոլսո Հայոց պատրիարքարանը հոկտեմբերին հայտարարել էր պատրիարք Մեսրոպ Մութաֆյանին պաշտոնանկ անելու որոշման մասին: Հայտարարությունը հրապարակվել էր պատրիարքարանի պաշտոնական էջում:

Նշենք, որ պատրիարք Մութաֆյանը կոմայի մեջ է գտնվում 2008թ. և փաստացի չի գործում որպես պատրիարք: Նրա փոխարեն այդ լիազորությունները կատարում է արքեպիսկոպոս Արամ Աթեշյանը, որն ընտրված է ոչ թե համայնքի, այլ պետության կողմից:

Ստամբուլի հայկական համայնքի ներկայացուցիչները տևական ժամանակ է՝ պահանջում էին կայացնել այդ որոշումը՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի:

http://www.tert.am/am/news/2017/01/12/atesyan-istanbul-armenians/2246394