Ստամբուլահայ մտավորական Երվանդ Օզուզունը (ընդդիմադիր Ժողովրդահանրապետական կուսակցության անդամ, Մեջլիսի հայազգի պատգամավոր Սելինա Դողանի հայրը) Ստամբուլի հայկական լրատվամիջոցներից «ՀայԹերթ»-ում հրապարակված իր հոդվածում պատմել է վերջերս իր հետ պատահած մի իրական դեպքի մասին, որը մեծ արձագանք է գտել համացանցի օգտատերերի շրջանում:
Երվանդ Օզուզունը կիսվել է իր ընկերներից մեկի կյանքի պատմությամբ և պատմել, թե ինչպես է «թուրք» ազգայնականներից մեկն իմացել իր հայկական արմատների մասին` իր ընտանիքի գլխին եկած մի մեծ փորձության` ժառանգական հիվանդության միջոցով:
Երվանդ Օզուզունի հոդվածն առանց կրճատման ներկայացնում ենք ստորև.
«Մի ծանոթ ունեմ: Ազգայնական վարքագծով մեկն է: Որոշ ժամանակ առաջ հանդիպեցի. նեղված էր: Ասաց, որ տղան հիվանդ է, բազմաթիվ բժիշկների մոտ են գնացել, բայց ոչ ոք բուժումը չի կարողացել գտնել: Հարցրի, թե ինչ տեսակի հիվանդություն է…
Ասաց, որ որովայնի և կրծքավանդակի շրջանում սուր ցավեր է ունենում:
Էրզրումի գյուղերից են, դա հին հայկական բնակավայր է, հայկական անվանումը` Կարին: Հնարավոր է, որ այս ամենը կապ ունենար տղայի հիվանդության հետ:
«Ձեր գյուղը հին հայկական գյո՞ւղ է եղել», – հարցրի ես:
Սկզբից նայեց այնպես, կարծես ուզում էր ասել, թե ինչու եմ հարցնում…Ասաց. «Այո, այդպես է»:
Ասացի, որ իր ընտանիքում կարող է հայության հետ ինչ-որ կապ լինել, իսկ այդ հիվանդությունը շատ հնարավոր է, որ հայերին հատուկ գենետիկ երևանյան (FMF) հիվանդությունն է:
Առաջարկեցի, որ հիշեցնի այս մասին բժշկին և համալսարաններին կից հետազոտական հիվանդանոցներ տանի տղային:
Ոչինչ չասաց: Կարծես նայում էր դեպի դատարկություն:
Հարցրի, թե ի՞նչ եղավ, ինչո՞ւ այդպես նեղվեց:
«Մերոնք ինչ-որ բաներ էին պատմում»,- ասաց:
Հասկացել էի: Նա էլ այս երկրում ապրող բազմաթիվ մարդկանց պես, ենթարկվելով ձուլմանը, փորձում էր թուրքերից ավելի ազգայնական երևալ:
Զանգեց: Գնացել էր Ջերրահփաշա, տղայի մոտ FMF են ախտորոշել: Ենթադրությունս ճիշտ էր:
Հեռախոսն անջատելուց առաջ ասացի. «Տեսնվենք, ազգակիցս», ասաց. «Տեսնվենք, իմ ազգակից եղբայր»։
http://www.tert.am/am/news/2016/12/26/yervant-ozunun/2235045
Leave a Reply