Դիարբեքիրի որոշ շրջաններում պարետային ժամ է հայտարարվել

Թուրքիայի Դիարբեքիր նահանգի Լիջե, Հազրո և Քոջաքյոյ շրջանների 11 գյուղերում պարետային ժամ (փողոց դուրս գալու արգելք) է սահմանվել:

Ըստ թուրքական «Milliyet» թերթի կայքի` պարետային ժամը հայտարարվել է Քուրդիստանի բանվորական կուսակցության (PKK-ՔԲԿ) զինյալների դեմ անվտանգության ուժերի կողմից իրականացվելիք գործողության պատճառով:

Դիարբեքիրի նահանգապետարանի կողմից տարածված հայտարարության մեջ նշվում է, որ գործողությունը նպատակ ունի վնասազերծել գյուղերի հարակից լեռնային և անտառային տեղանքներում գործունեություն ծավալող ՔԲԿ-ականներին, որոնց մեջ կան նաև կազմակերպության բարձրաստիճան պատասխանատուներ:

Գործողության ընթացքում նախատեսվում է նաև վերացնել զինյալների կողմից օգտագործվող թաքստոցներն ու զինապահեստները, ինչպես նաև ոչնչացնել վերջինների` ինքնաթիռներ խոցելու համար նախատեսված դիրքերը:

Նշվում է, որ պարետային ժամի ավարտի մասին լրացուցիչ կտեղեկացվի:

Ermenihaber.am