Թուրքիայում ձերբակալվել են ընդդիմադիր «Բիրգյուն» շաբաթաթերթի պատասխանատու Մահիր Քանաաթը, «Դիքեն» լրատվական կայքի խմբագիր Թունջա Օղրեթենը, լրագրող Մեթին Յոքսուն և «Դիհաբեր» կայքի խմբագիր Օմեր Չելիքը:
Ոստիկանության հատուկջոկատայինները ներխուժել են Ստամբուլում և Դիարբեքիրում նրանց տները, հաղորդում է թուրքական «Ջումհուրիյեթ» պարբերականը:
Հայտնի է, որ հատուկջոկատայինները «Դիհաբեր»-ի խմբագիր Չելիքի հանդեպ ուժ են կիրառել, զենքով սպառնացել են նրա մորն ու կնոջը, իսկ Չելիքին անպատվել՝ «հայի ծնունդ» ասելով:
«Դու լուրեր ես գրում, հա՞: Դեհ հիմա գրիր տեսնենք, դուք հայի ծնունդներ եք, դեհ գրիր տեսնենք», – ասել են հատուկջոկատայիններն ու մի քանի անգամ հարվածել խմբագրին:
Չելիքի գործով դատավարությունը գաղտնի կպահվի ԶԼՄ-ներից:
Հիշեցնենք, որ հոկտեմբերի 31-ին Թուրքիայի ոստիկանությունն Անկարայում հատուկ գործողություն էր իրականացրել ընդդիմադիր «Ջումհուրիյեթ» թերթի աշխատակիցների դեմ: Խուզարկություններ էին իրականացվել թերթի տնօրենի, խմբագիրների և մի շարք սյունակագիրների տներում: Ձերբակալված է նաև թերթի գլխավոր խմբագիր Մուրադ Սաբունջուն:
http://www.tert.am/am/news/2016/12/26/dihaber-birgun-diken/2234604
Leave a Reply