Թուրքիայի ընդդիմադիր Ժողովրդահանրապետական կուսակցության խոսնակ Սելին Սայեք Բյոքեն Անկարայում ՌԴ դեսպանի սպանության համար մեղադրում է Թուրքիայի իշխանություններին, գրում է Sputnik-ի թուրքական ծառայությունը:
Բյոքեն նշել է, որ Հալեպի՝ սիրիական բանակի վերահսկողության տակ անցնելուց հետո Թուրքիայում մեծ թափով սկսված հակառուսական և հակաիրանական ցույցերին իշխանությունները հետևում էին գոհունակությամբ՝ անտեսելով և չմիջամտելով ռասիստական և ծայրահեղական բազմաթիվ հայտարարություններին:
«Գաղափարական այս մթնոլորտում Ռուսաստանի դեսպանատան դիմաց ցույցերի ընթացքում ջիհադի դրոշներ էին ծածանվել: Այս ամենի վրա աչք փակեցին»,- ասել է քեմալականների խոսնակը և հայտարարել, որ այս հանցագործության միակ մեղավորն իշխանություններն են:
«Եթե ատրճանակի ձգանը գյուլենական է քաշել՝ նշանակում է դուք եք նրան մեր գլխին պատուհաս դարձրել: Եթե «Ջեբհաթ ան Նուսրան» է, ապա կրկին դուք եք ջիհադականներին ամեն տեսակ օժանդակություն ցույց տվել: Սահմանային անվտանգությունը չապահովողը դուք եք: Պատասխանատուն դուք եք»,-ասել է Բյոքեն և հավելել, որ Թուրքիայում այլևս ոչ ոք իրեն ապահով ու անվտանգ չի զգում:
Հիշեցնենք, որ սպանության օրն Անկարայի քաղաքապետ Մելիհ Գյոքչեքը Twitter-ի իր էջում ակտիվորեն շահարկել էր մարդասպան Մևլութ Մերթ Ալթընթաշի՝ հուլիսի 15-ի հեղաշրջման փորձի կազմակերպման համար մեղադրվող Ֆեթուլլահ Գյուլենի «Հիզմեթ» շարժման անդամ լինելը: Այնուհետև նույն տեսակետը բարձրաձայնվել է երկրի նախագահի և արտգործնախարարի կողմից:
Leave a Reply