Թուրքիայի Կայսերի քաղաքում տեղի ունեցած ահաբեկչական հարձակման հեղինակը, ամենայն հավանականությամբ, 40-45 տարեկան տղամարդ է եղել։ Այս մասին հայտնել է ահաբեկչության հետևանքով վիրավորված զինվորներից մեկը, որը նշել է, որ թեև զինվորների տեղափոխող ավտոբուս քաղաքացիական անձանց նստելն արգելված է, ավտոբուս է բարձրացել քաղաքացիական հագուստով մի տղամարդ: Այս մասին հայտնում է թուրքական Diken.com.tr կայքը:
«Ամենավերջինը նա նստեց: Ձեռքին մի պայուսակ կար: Կանգառում իջավ՝ ետ նայելով գնաց», – պատմել է զինվորը:
Հիշեցնենք, որ ավելի վաղ Թուրքիայի վարչապետ Բինալի Յըլդըրըմը հայտարարել է, որ Կայսերի քաղաքում ահաբեկչություն իրականացնողը մահապարտ է եղել:
Ահաբեկչության հետևանքով մահացած զինվորների թիվը հասել է 14-ի, ներկայում բժիշկների հսկողության տակ է գտնվում 56 վիրավոր: Ավտոբուսում գտնվող զինվորները հատուկ թույլտվությամբ դուրս էին եկել զորամասերից՝ առևտրի նպատակով:
Թուրքական «Բիրգյուն» պարբերականն աղմկահարույց բացահայտում էր արել՝ հայտնելով, որ հարձակումից դեռևս 4 օր առաջ Թուրքիայի շրջակա միջավայրի և քաղաքաշինության նախարար Մեհմեդ Օզհասեկին, այցելելով Կայսերի, տեղի զինվորականներին ողջունելիս նշել է. «Ալլահը եթե թույլ տա՝ ես էլ նահատակ կդառնամ, դուք էլ նահատակ եղեք: Ալլահի թույլտվությամբ դա մեզ ավելի դաժան կդարձնի և ավելի կկատաղեցնի, և սրանց մաքրման գործընթացն ավելի արյունոտ կվարենք»:
Leave a Reply