Էրդողանը հիշել է Սևրն ու ազգային մոբիլիզացիայի կոչ արել

Թուրքիայի նախագահ Ռեջեփ Թայիփ Էրդողանը գյուղապետերի հետ հանդիպմանը բոլոր «ահաբեկչական» կազմակերպությունների դեմ ազգային մոբիլիզացիայի կոչ է արել:

Ըստ թուրքական «Sabah» իշխանամետ թերթի կայքի` Էրդողանն այսօրվա Թուրքիայի «պայքարը» համեմատել է Աթաթուրքի ազգայնամոլական պայքարի հետ` ասելով. «Մեր ապրած ժամանակաշրջանը առնվազն անկախության պատերազմի (ազգայնամոլական շարժում-խմբ.) չափ կարևոր է: Առաջին համաշխարհային պատերազմից հետո ժամանակի ուժեղները Թուրքիային, Կենտրոնական Անատոլիայում սեղմելով, Սևրում գծած պայմանագրով ցանկանում էին բանտարկել մի բուռ հողի վրա:

Թեև չկարողացանք ամբողջովին հասնել «Ազգային ուխտի» բոլոր նպատակներին, սակայն կարողացանք Սևրը թղթի կտորի վերածել: Այժմ էլ մեծ խաղ է խաղարկվում: Հարձակումն ուղղված է այն պայքարին, որը մղում ենք ազատ և բարգաված Թուրքիա ունենալու համար»:

Շարունակելով խոսքը` Էրդողանը դիմել է Թուրքիայի քաղաքացիներին. «Այստեղից դիմում եմ բոլոր քաղաքացիներիս: Ըստ սահմանադրության 104-րդ հոդվածի` ես որպես պետության գլուխ PKK-ի, (ՔԲԿ) DEAŞ-ի (ԻՊ), FETÖ-ի (գյուլենական շարժում), DHKP-C-ի (Հեղափոխական ժողովրդական ազատագրական կուսակցություն-ճակատը) և մնացած բոլոր ահաբեկչական կազմակերպությունների դեմ ազգային մոբիլիզացիա եմ հայտարարում»:

Ermenihaber.am