Բրիտանական The Times–ը վերահրատարակել է Հայոց ցեղասպանության մասին հոդվածը, որը տպագրվել էր ուղիղ 100 տարի առաջ

Բրիտանական The Times–ը ներկայացրել է այն հոդվածը, որը թերթում տպագրվել էր 1916թ․ դեկտեմբերի 14-ին։

Հոդվածում ներկայացված են փաստաթղթեր, որոնք վկայում են 1915-ի ողբերգական իրադարձությունների մասին։ Փաստաթղթերը իրենցից ներկայացնում են «սարսափների երկար կատալոգ, որոնց զուգահեռները դժվար թե հնարավոր լինի գտնել հին կամ ժամանակակից պատմության մեջ»։ Հոդվածում նշվում է, որ մինչ այդ Օսմանյան Թուրքիայում մոտ 1․8 մլն հայ էր բնակվում։ Նրանցից մի քանիսին հարկադրել են իսլամ ընդունել, մյուսները սպանվել են կամ էլ գտնվում են Թուրքիայում, սարսափելի պայմաններում։ Փաստաթղթերում նկարագրված են հայ կանանց ու աղջիկների նկատմամբ սարսափելի վերաբերմունքի օրինակներ։

«Բավական է միայն մեկ փաստ, որպեսզի ցույց տանք, թե ինչ հատուկ մանրակրկտությամբ էր իրականացվում հայերի տեղահանությունն ու մասնակի ոչնչացումը։ Անցած տարի Էրզրում, Բիթլիս ու Վան վիլայեթներում բնակվում էր մոտ 580 հազար հայ։ Երբ այդ շրջանները անցան ռուսների հսկողության տակ, այնտեղ միայն 12.100 հայ կար։ Մնացածը կամ մահացած էին, կամ տեղահանված»,- ասվում է հոդվածում։

Հեղինակները նաեւ նշում են, որ զանգվածային սպանությունները համակարգված ու միտումնավոր բնույթ ունեին ու նախապես ծրագրված են եղել Կոնստանդնուպոլսում։ «Շրջանը շրջանի հետեւից, մինչեւ ամբողջ ասիական քաղաքներում ու գյուղերում Թուրքիայում հայկական թաղամասերը չդատարկվեցին»,- շեշտվում է հոդվածում։

Հեղինակները նշում են, որ այդ իրադարձությունների համար հիմնական մեղքը երիտթուրքերինն է, սակայն մեղավորները ոչ միայն Կոնստանդնուպոլսում են, այլեւ Բեռլինում, որտեղ այդ իրադարձութունների վրա աչք են փակել։

https://news.am/arm/news/362773.html