Յայտնի չէ, թէ ե՛րբ Ֆրանսա պիտի ընդունի Ցեղասպանութեան հերքումը քրէականացնող օրինագիծը

Յայտնի չէ, թէ ե՛րբ Ֆրանսայի մէջ օրէնքի ուժ պիտի ստանայ Հայոց ցեղասպանութեան հերքումը քրէականացնող «Հաւասարութիւն եւ  քաղաքացիութիւն» անուանումը կրող օրինագիծը, թէեւ Ֆրանսայի նախագահ Ֆրանսուա Հոլլանտի պաշտօնավարումը կը մօտենայ  իր աւարտին:

Յիշեցնենք, որ Ֆրանսայի նախագահ Ֆրանսուա Հոլլանտը իր ընտրարշաւին օրերուն խոստացած էր նման օրէնք ընդունիլ, երբ փետրուար 2012-ին Ֆրանսայի Սահմանադրական խորհուրդը հակասահմանադրական նկատած էր Ֆրանսայի խորհրդարանի երկու պալատներու համաձայնութեան արժանացած նմանատիպ օրէնքը` խօսքի ազատութիւն խոչընդոտելու հիմնաւորումով:

Նման օրինագիծ ընդունելու երկրորդ փորձը եւս սկսած էր յաջողութեամբ. Ֆրանսայի Ծերակոյտը Հայոց ցեղասպանութեան ժխտումը քրէականացնող օրինագիծը ընդունեց 14 հոկտեմբերին: Օրինագծին կողմ քուէարկած էին` 156, դէմ` 146 ծերակուտական: Իսկ 2 յուլիսին օրինագիծը միաձայնութեամբ ընդունուած էր Ֆրանսայի Ազգային ժողովի Ստորին պալատին կողմէ: Տեղեկացնենք նաեւ, որ օրինագիծին համաձայն, ցեղասպանութիւնները հերքելու համար կը սահմանուի մէկ տարուան ազատազրկում եւ 45 հազար եւրօ տուգանք: Ֆրանսայի կողմէ ճանչուած բոլոր ցեղասպանութիւններու, մարդկութեան դէմ յանցագործութիւններու հերքումը կը գտնուի այս օրէնքին տակ:

Այնուամենայնիւ, Հայաստանի եւ Ֆրանսայի հայկական համայնքին մէջ մտահոգութիւններ կան օրինագիծի հաստատման առնչութեամբ, որովհետեւ ինչպէս նախորդ անգամ, այս անգամ եւս Ֆրանսայի թրքական լոպին կը պահպանէ օրինագիծը Սահմանադրական խորհուրդին մէջ վիճարկելու կարելիութիւնը:

«168.am»-ի հետ զրոյցի մը ընթացքին ՀՅԴ Բիւրոյի անդամ, Ֆրանսայի հայկական կազմակերպութիւններու համակարգող խորհուրդի համանախագահ Մուրատ Փափազեան տեղեկացուց, որ տակաւին յստակութիւն չկայ օրինագիծի վերջնական հաստատման հարցով: Անոր տեղեկութիւններով` ամբողջական օրինագիծը կրկին պէտք է հաստատուի Ֆրանսայի Ազգային ժողովին կողմէ, որմէ ետք միայն, հաւանաբար յունուարին, անցնի Սահմանադրական դատարան: Լսումներուն կազմակերպման մասին Մուրատ Փափազեան տակաւին յստակ տեղեկութիւններ չունի:

Պատասխանելով այն հարցումին, թէ կարելի՞ է` օրինագիծի ընդունումը այնքան ձգձգուի, որ նախագահական ընտրութիւններէն ետք խափանուի այս օրինագիծի ընդունման հոլովոյթը, Փափազեան պատասխանեց. «Չեմ կրնար ճշգրիտ պատասխան տալ, պէտք է տեսնել, թէ ի՛նչ ընթացք կ՛ունենայ այս օրինագիծը: Յունուարին աւելի լաւ նորութիւններ կ՛ունենանք»:

Նշենք նաեւ, որ Ֆրանսայի մէջ նախագահական ընտրութիւնները տեղի պիտի ունենան ապրիլ 2017-ին:

http://www.aztagdaily.com/archives/328413