Amnesty International միջազգային իրավապաշտպան կազմակերպության Թուրքիայի գրասենյակը գնահատել է Դիարբեքիրի Սուր շրջանում թուրքական ԶՈՒ-ի գործողությունների ծանր հետևանքները:
Հիշեցնենք, որ Սուրում թուրքական հատուկ ուժերի գործողությունները սկսվել էին 2015թ. սեպտեմբերի 6-ին և ավարտվել 2016թ. մարտի 10-ին:
Ինչպես հաղորդում է թուրքական Diken.com.tr կայքը, թուրք-քրդական բախումների հետևանքով խոշոր ավերածությունների ենթարկված Սուրի շրջանում ռազմական գործողություններից տուժել է ավելի քան 40.000 խաղաղ քաղաքացի:
Սուրի աղետի պատճառով ավերածության է ենթարկվել շրջանի շուրջ 29.000 թաղամաս:
Իրենց տները լքած տասնյակ հազարավոր քաղաքացիներ նշել են, որ Սուրից հեռանալու պատճառներից է նաև ռազմական գործողությունների ընթացքում ջրի, էլեկտրաէներգիայի մատակարարման դադարեցումը, ինտենսիվ ռմբակոծումները, ինչպես նաև փողոց դուրս գալու արգելքի սահմանումը, որի ընթացքում բավականաչափ հոգեպահուստ չունեցած ընտանիքները մատնվել են սովի:
Սուրից արտագաղթած ընտանիքները պատմել են, որ ներկայում հիմնականում բնակվում են Դիարբեքիրի տարբեր շրջաններում, որտեղ բնակարաններ են վարձակալում սեփական միջոցներով, իսկ 29 ընտանիք մինչ օրս մնում է ժամանակավոր կացարանում:
Շատերը նշել են, որ Սուրից դուրս գալուց հետո իրենցից շատերի տներն ավերվել են, իսկ հայրենի թաղամասում դեռևս տիրում է վախի մթնոլորտ. բազմաթիվ փողոցներ մուտքը դեռևս արգելված է:
«Տունս կորցնելու համար այնքան եմ արտասվել, որ այլևս աչքիցս արտասուք չէր գալիս: 25 հավ, 20 աղավնի ունեի այգում: Չգիտեմ՝ դրանց ինչ եղավ: Այգում թզի ծառ ունեինք ու փոքրիկ ջրի ավազան: Փողոց դուրս գալու արգելքի ժամանակ 90 օր շարունակ այդ ավազանի մեջ լցված ջրից ենք օգտվել»,- պատմել է Սուրի նախկին բնակիչներից մեկը:
Արտագաղթել չցանկացող և մինչև վերջին վայրկյանն իր հոր հետ Սուրի իրենց տանը մնացած երիտասարդը պատմել է, որ դուրս գալ չցանկացողներին թուրքական ԶՈւ-ի հատուկջոկատայինները բռնի ուժով են դուրս հանել իրենց տներից:
«Մնացինք ես, եղբայրս և հայրս: Չէինք ուզում մեր տունը լքել: Հատուկջոկատայինները, զենքերը մեր գլխին պահելով, դուրս բերեցին մեզ: Ոստիկաններն ասացին, թե բախտավոր ենք, որովհետև սովորաբար հատուկջոկատայինների ձեռքից ողջ չեն փրկվում», – պատմել է երիտասարդը:
http://www.tert.am/am/news/2016/12/06/diyarbakir-sur/2214635
Leave a Reply