Ինչո՞ւ է Թուրքիան փորձում քրդական հարցը ներկայացնել որպես հայկական. թուրք սյունակագրի անդրադարձը

Թուրք սյունակագիր Սերդար Քորուջուն Gazeteduvar.com.tr կայքում հրապարակված իր նոր հոդվածում անդրադարձել է վերջին շրջանում տարբեր թուրք պաշտոնյաների կողմից հաճախակի կրկնվող թուրքական քարոզչական մի թեզի, ըստ որի, թուրք վերնախավը հաճախ փորձում է երկրում առկա քրդական հարցը բարդել համայն աշխարհի հայության վրա:

Ինչպես գրում է Քորուջուն, դեռևս 1980-ական թթ. մեծ տարածում գտած «Քուրդիստանի աշխատավորական կուսակցությունը հայկական նախագիծ է»,«Այս երկրում չկա քրդական հարց, կա միայն հայկական հարց» շարքի թեզերը Թուրքիայում սկսեցին ավելի հաճախ վերհիշել վերջին շրջանում, երբ Թուրքիայի արևելքում և հարավ-արևելքում նոր թափով վերսկսվեցին թուրք-քրդական բախումները:

Ստամբուլում նոյեմբերի 18-21-ը անցկացվող ՆԱՏՕ-ի խորհրդարանական վեհաժողովի քննարկումների ժամանակ ՔԱԿ-ի ներսում իբրև թե հայ գրոհայինների առկայության մասին մեղադրանք հնչեցվեց Թուրքիայի արտաքին գործերի նախարարի մակարդակով:

Վեհաժողովի քննարկումների ժամանակ հայկական պատվիրակության նախագահ Կորյուն Նահապետյանի հարցին պատասխանող Չավուշօղլուն հայտարարեց. «Մեր կողմից ձերբակալված ՔԱԿ գրոհայինների շարքում հայեր էլ կան»:

Թուրքիայում բավականին լայն տարածքում ստացած այս քարոզչական թեզի մասին խոսելիս թուրք սյունակագիրը հիշեցնում է դեռևս տարիներ առաջ Պոլսո Հայոց պատրիարք Մեսրոպ Մութաֆյանի կողմից՝ թեմայի վերաբերյալ տրված պատասխանը:

«Մինչև այսօր ձերբակալված ՔԱԿ զինյալների շրջանում ոչ մի հայ չկա: Եթե այդպես լիներ՝ օրվա մեջ 10 անգամ հեռուստացույցով ցույց կտային: Թող ապացույցներ ներկայացնեն՝ մենք էլ հավատանք»:

Սերդար Քորուջուն նաև ուշադրություն է հրավիրել այն փաստի վրա, թե 1980-ականների վերջին և 1990-ականների սկզբին ի՞նչ հետևանքների բերեց այս տեսակ քարոզչությունը:

1994թ. հունվարի 12-ին Tempo ամսագրին տված հարցազրույցում պատրիարք Մութաֆյանը պատմել էր, որ նման անհիմն մեղադրանքների պատճառով հայկական համայնքի շուրջ չափից դուրս լարված իրավիճակ է ստեղծվել:

«Նրանք ուզում են, որպեսզի մենք լքե՞նք երկիրը: Այսօր իշխանությունները հայերի դեմ ատելությունն օգտագործում են ՔԱԿ-ի դեմ պայքարում: Նրանք ցանկանում են ցույց տալ, թե Թուրքիայի միակ խնդիրը փոքրամասնությունների խնդիրն է: Մինչդեռ Թուրքիայի քրիստոնյա հայերի քանակը ընդամենը 60 000 է: Անատոլիայի տարածքում որքա՞ն են մնացել՝ չգիտեմ, սակայն այնտեղ էլ շատ չեն: Այսքան քիչ մարդկանց խումբն ի՞նչ խնդիրներ կարող է առաջացնել: Վերջին շրջանում հայերի՝ ՔԱԿ-ի հետ իբրև թե համագործակցելու վերաբերյալ սուտ լուրերը ավելի են շատացել: Մեր դպրոցների շենքերը քարկոծվում են: Հայ բառն օգտագործվում է որպես հայհոյանք: Անցյալ օրը Բեյազիդի մզկիթի դիմացից մի խումբ քայլել է դեպի եկեղեցի: Լավ է, որ ոստիկանությունը ճանապարհին կանգնեցրել է: Անցյալ ամառ նորից հարձակում էր իրականացվել եկեղեցու վրա. եկեղեցու պատուհանները, դռները կոտրվել էին», – ասել էր Մութաֆյանը:

Սերդար Քորուջուն, մեջբերելով դեռևս 23 տարի առաջ տեղի ունեցած այս հարցազրույցը, ցավով արձանագրել է, որ հայերի՝ ՔԱԿ-ի հետ կապերի մասին սուտ քարոզչական թեզը պաշտոնական կերպով վերադառնում է երկրի օրակարգ:

ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:

Կազմակերպությունը 1978 թ. հիմնադրել է Աբդուլլահ Օջալանը, ով ներկայում ցմահ ազատազրկում է կրում թուրքական Իմրալը կղզու բանտում, սակայն շարունակում է համարվել կազմակերպության ղեկավարը։

http://www.tert.am/am/news/2016/11/24/pkk/2202859