Թուրքիայում լույս է տեսել Զաբել Եսայանի «Հոգիս աքսորյալ» գիրքը

Թուրքիայում լույս է տեսել ժամանակի առաջատար հայ գրողներից մեկի՝ Զաբել Եսայանի «Հոգիս աքսորյալ» գիրքը: Ինչպես հայտնում է «Արևելքը», Մեհմեթ Ֆաթիհ Ուսլուի կողմից թուրքերեն թարգմանված գիրքը լույս ընծայել «Արաքս» հրատարակչությունը:

Օսմանյան կայսրության անկման ժամանակաշրջանին վերաբերող այս ստեղծագործությունն առաջին անգամ հրատարակվել է Վիեննայում՝ 1922 թ-ին:

«1878թ. փետրվարի 5-ին Ստամբուլի Սկյուտար թաղամասում ծնված, ապա Սորբոնում կրթություն ստացած Զաբել Եսայանը ամեն անցնող օր ավելի ու ավելի է ճանաչվում Թուրքիայում: Պատճառը ոչ միայն այն է, որ նա մեկն էր Հայոց ցեղասպանության սկիզբը համարվող 1915թ. ապրիլի 24-ին ձերբակալված հայ մտավորականներից: Մեծ դեր է խաղում նաև այն, որ ձերբակալվածների ցուցակում տեղ գտած այս միակ կնոջ գրքերը թարգմանվում և հրատարակվում են թուրքերեն», – գրում է «CNN TÜRK»-ը:

Ավելի վաղ «Արաքս» հրատարակչության կողմից հրատարակվել են նաև Եսայանի «Արդարության Ճիչ», «Ավերակների մեջ», «Մելիհա Նուրի Հանըմ» գրքերը:

Culture.am