Հունաստանի ՊՆ-ն Էրդողանին սպառնացել է վերադառնալ Սևրի պայմանագրին

Թուրքիայի նախագահ Էրդողանի` «մեզ Սևրի պայմանագիր ցույց տալով՝ Լոզանի պայմանագիր պարտադրեցին» խոսքերի պատասխանը չի ուշացել Հունաստանից:

Ըստ Siyasihaber3-ի՝ Հունաստանի պաշտպանության նախարար, Անկախ հույներ կուսակցության նախագահ Փանոս Քամենոսը պատասխանել է Էրդողանին՝ իր խոսքը սկսելով հետևյալ կերպ. «Միջազգային համաձայնագրերը քննադատելու համարձակություն ցուցաբերողներին ցանկանում եմ ուղերձ հղել»: Նա նշել է, որ Թուրքիան պարբերաբար իր հայտարարություններով փորձում է մթնոլորտը թեժացնել:

«Եթե Էրդողանը ցանկանում է Լոզանի պայմանագիրը չեղարկել, կվերադառնանք Սևրի պայմանագրին: Մի կետ կա, որ բոլորս պետք է հասկանանք՝ Թուրքիայի զինված ուժերի կրած կորուստները, ռազմական հեղաշրջման փորձից հետո նրա ուժի նվազումը, Սիրիայում անվերջ պարտությունները նրան ստիպում են այսպիսի հիմար հայտարարություններ անել: Դրա հետևանքը բոլորս տեսանք՝ ծնկի իջած Էրդողանը ՌԴ-ի նախագահ Պուտինից ներողություն խնդրեց Սիրիայի վերաբերյալ իր հայտարարությունների համար: Նա պետք է հասկանա, որ ներքին քաղաքականության համար չի կարող անհանգստացնել միջազգային հանրությանն ու Հունաստանին»,- ասել է Հունաստանի ՊՆ ղեկավարը:

http://www.yerkir.am/news/view/118323.html