Սկյուտարի հայկական դպրոցի պատին ռասիստական գրություն են թողել

Թուրքիայում ուսումնական տարվա առաջին օրը Սկյուտարում գտնվող Գալֆայան հայկական նախակրթարարանի պարտեզի պատին ռասիստական գրություն է հայտնվել:

Քրդամետ Ժողովուրդների դեմոկրատական կուսակցության կենտրոնական գործադիր խորհրդի և հայկական «Նոր զարթոնք» կազմակերպության անդամ Մուրադ Մըհչըն «Twitter»-ի միկրոբլոգում տարածել է լուսանկար, որտեղ երևում է դպրոցի պարտեզի պատին գրված «Կեցցե՛ թուրքական ցեղը» արտահայտությունը:

Թուրքական «Diken» լրատվական կայքը հայտնում է, որ վերջին շրջանում հայկական դպրոցների վրա հարձակումներն աճել են: Աղբյուրը նաև հիշեցնում է, որ այս տարվա մեջ սա Գալֆայան դպրոցի վրա երկրորդ հարձակումն էր: Առաջինը տեղի էր ունեցել Հրանտ Դինքի սպանության տարելիցին՝ 2016թ. հունվարի 19-ին, երբ անհայտ անձիք դպրոցի պատին գրել էին. «Տառապանք հային»:

Ermenihaber.am