Ալին Օհաննեսյանի՝ Ցեղասպանության մասին պատմող վեպը հայտնվել է «Դեյթոն» գրական մրցանակի եզրափակչում

Ամերիկահայ գրող Ալին Օհաննեսյանի «Օրհանի ժառանգությունը» վեպը դարձել է «Դեյթոն» խաղաղության գրական մրցանակի եզրափակիչ փուլի 12 մասնակիցներից մեկը` տեղ գտնելով գեղարվեստական ու ոչ գեղարվեստական կատեգորիաներում, հաղորդում է Ամերիկայի «Ասպարեզ» պարբերականը:

Նշվում է, որ յուրաքանչյուր կատեգորիայում առաջին և երկրորդ տեղը զբաղեցրած մասնակիցները կհայտարարվեն հոկտեմբերի 11-ին: Հաղթողները կստանան 10 հազար, իսկ երկրորդ տեղը զբաղեցրածները` 2,5 հազար դոլար գումար:

Նշենք, որ Ալին Օհաննեսյանը Հայոց ցեղասպանությունից փրկվածների ժառանգ է: Նա այցելել է Արևմտյան Հայաստանի Սեբաստիա քաղաք, որտեղ և տեղի են ունենում «Օրհանի ժառանգությունը» վեպում ծավալվող իրադարձությունները, ինչից հետո 6 տարվա ընթացքում գրել է այն:

Hayernaysor.am