Ստամբուլի հայերն ու հույները երթ կկազմակերպեն՝ ի հիշատակ 1955թ. սեպտեմբերյան դեպքերի ժամանակ տուժած քրիստոնյաների

Ստամբուլի Գալաթասարայ հրապարակում տեղի կունենա երթ՝ նվիրված 1955թ. սեպտեմբերի 6-7-ի դեպքերի ժամանակ զոհված հույների և հայերի հիշատակին:

Բազմաթիվ հայեր և հույներ երեկոյան ժամը 18:30-ին կհավաքվեն՝ «Մենք չենք մոռացել» պաստառներ պահելով, գրում է «Ակօս»-ը։

Պատմական ակնարկ

1955թ. սեպտեմբերի 6-ի առավոտյան թուրքական «Իսթանբուլ Էքսպրես» թերթը լույս տեսավ «Մեր նախնիի տունը պայթուցիկով հարձակման է ենթարկվել» գլխավոր վերնագրով:
Հոդվածում հեղինակն ահազանգում էր այն մասին, որ Հունաստանի Սալոնիկ քաղաքում գտնվող Մուսթաֆա Քեմալ Աթաթուրքի տունը, որտեղ ծնվել է Թուրքիայի առաջին նախագահը, պայթեցվել է հույների կողմից:

Թեև ավելի ուշ պարզ դարձավ, որ տեղեկությունը չի համապատասխանում իրականությանը, սակայն սադրիչ լուրն արդեն իր գործն արել էր:
Ստամբուլի, Անկարայի և Իզմիրի թուրքերն անցան ակտիվ հարձակումների քաղաքների հունական բնակչության դեմ: Այդ ընթացքում տուժեցին նաև բազմաթիվ հայեր և հրեաներ:

Խոշոր ավերածությունների ենթարկվեցին հատկապես Ստամբուլի քրիստոնեաբնակ Բեյօղլու, Քուրթուլուշ, Սամաթիա թաղամասերը, ինչպես նաև Ստամբուլի կղզիներում գտնվող հույների և հայերի ամառանոցները:

Ըստ թուրքական մամուլի՝ դեպքերի ժամանակ մահացել է 11 հոգի: Մինչդեռ հայ և հույն համայնքների պնդմամբ՝ մահացածների թիվն ավելի շատ է եղել:
Դեպքերի ընթացքում ավերվել են բազմաթիվ տներ, քրիստոնյաներին պատկանող խանութներ և գործարաններ:
Այս հարձակումները պատճառ դարձան բազմաթիվ հայերի և հույների՝ Թուրքիայից արտագաղթելուն, նոսրացան հայ և հույն համայնքները:

http://www.tert.am/am/news/2016/09/05/istanbul/2124256