Թուրքիայում ձերբակալվել է Հրանտ Դինքի սպանության գործով դատավորը

Պոլսահայ լրագրող, Թուրքիայում լույս տեսնող «Ակօս» թերթի նախկին գլխավոր խմբագիր Հրանտ Դինքի սպանության գործով դատավարության գլխավոր դատավոր Ռուստեմ Յըլմազը ձերբակալվել է:

Ոստիկանները նրան գտել և բերման են ենթարկել Թուրքիայի Մանիսա քաղաքում, գրում է T24.com.tr-ն։
Յըլմազին ներկայացվել է ահաբեկչական խմբավորումների հետ կապեր ունենալու մեղադրանք:

Այս ձերբակալությունը նույնպես իրականացվել է հուլիսի 15-ի հեղաշրջման տապալված փորձից հետո պետության կողմից առաջնորդվող ոստիկանական հատուկ գործողությունների շրջանակում:
Հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, ով ներկայում բնակվում է ԱՄՆ Փենսիլվանիա նահանգում:

http://www.tert.am/am/news/2016/08/19/turkey/2109541