«Գյուլենի ձեռքում իսլամացած հայերի մասին տվյալներ կան». թուրք ազգայնամոլ

CNN Türk-ի եթերում Ֆեթուլլահ Գյուլենի ունեցած առնչությունների և կատարած գործողությունների մասին հարցազրույց տված Հյուսեին Գյուլերջեն նշել է. «Քանի որ Գյուլենը, 15 տարի է, ԱՄՆ-ում է բնակվում, կարծում եմ, որ նա աջակցություն է ստանում այնտեղի հետախուզական մարմիններից: Անում է այն, ինչ իրենից պահանջում է ԱՄՆ-ն: Նրա ձեռքին են գտնվում Թուրքիայի բնակչության բոլոր մատյանները: Նա ինքն է ինձ դրանք ցույց տվել: Նշանավոր անձանց ներկայացնելով` ասել է, թե նրանցից ովքեր են հույն, ովքեր` հայ»:

Այդ մասին, ըստ Akunq.net-ի, ծայրահեղ ազգայնական «Յենի չաղ» պարբերականում գրել է թուրք ազգայնամոլ Արսլան Բուլութը: Հեղինակը հոդվածում նաև հիշեցրել է, որ Հրանտ Դինքն սպանվել էր Սաբիհա Գյոքչենի հայ լինելու մասին ենթադրություն անելու պատճառով:

Արսլան Բուլութը «Գյուլենի ձեռքում գտնվող բնակչության մատյանները» վերնագրով հոդվածում անդրադարձել է նաև Գերմանիայում կայացած մի խորհրդաժողովի ժամանակ ելույթ ունեցած դոկտոր, պրոֆ. Հասան Քյոնիի հետևյալ խոսքերին. «Տեղահանության ժամանակ իրենց բնակավայրերից չհեռանալու նպատակով իսլամացած հայեր էլ կան: Սակայն մենք չենք կարող իմանալ, թե ովքեր են նրանք: Նրանց թիվը 300-400 հազար է: Բացի այդ, կան նաև կրոնափոխ հրեաներ և կրոնափոխ հույներ: Դժբախտաբար, Թուրքիայի Հանրապետությունն իր քաղաքացիներին անհանգստություն չպատճառելու համար չի բացահայտում նրանց: Թերևս, պետության ղեկին ևս հայկական ծագմամբ բարձրաստիճան պաշտոնյաներ ունենք»:

Ազգայնամոլ հեղինակը նաև հիշեցնում է Հրանտ Դինքի հետևյալ խոսքը, որ նա ասել էր Հայաստանում. «Դուք խոսում եք 1.5 միլիոն զոհերից: Այնինչ, նույն ժամանակաշրջանում մոտ 500 հազար հայեր, կրոնափոխ լինելով, թուրք էին դարձել: Ինչո՞ւ նրանց հաշվի չեք առնում»:

Հիշեցնենք, որ Թուրքիայում բռնի կրոնափոխված հայերի թեմային պարբերաբար անդրադարձող ազգայնամոլ Արսլան Բուլութը դեռ 2010 թվականին շեշտում էր, թե «Թուրքիայի հիմնական խնդիրը ծպտյալ հայերն են»

Մելինե Անումյան

Akunq.net