Ստամբուլում թերթի հղի աշխատակցուհուն ծեծել են բաց հագուստի համար

Ստամբուլում ծեծի են ենթարկել Evrensel թերթի հղի աշխատակցուհի Հազալ Օլմեզին, հաղորդում է РИА Новости-ն՝ հղում անելով Hürriyet-ին։ Նշվում է, որ ծայրահեղական հայացքներ ունեցող անձինք հղիության վեցերորդ ամսում գտնվող կնոջը ծեծել են բաց հագուստով փողոց դուրս գալու համար։

«Ես իմ սովորական երթուղով աշխատանքից տուն էի վերադառնում, երբ ինչ-որ մեկը հանկարծ քաշեց մազերս։ Շրջվեցի ու փարաջայով կին տեսա։ Հարցրեցի, թե ինչ է պատահել, բայց նա սկսեց հարձակվել ինձ վրա` մեղադրելով, որ բաց հագուստ եմ կրում ու Գյուլենի կողմնակիցն եմ (ընդդիմադիր իսլամական քարոզիչ, որին Անկարան մեղադրում է հեղաշրջման փորձի կազմակերպման մեջ-խմբ.)»,- պատմել է Օլմեզը։

Նրա խոսքով՝ հարձակմանը մասնակցել են երկու կին և մեկ տղամարդ։ Հարձակվողները տուժածին հայտնել են, որ այսուհետ նա պետք է հագնվի այնպես, ինչպես իրենք են ուզում, և ենթարկվի նրանց, ինչից հետո սկսել են կնոջը ծեծել ու անցորդներին իրենց միանալու կոչեր անել։

Օլմեզը մանրամասնում է, որ իսլամիստների խումբը ծեծկռտուքը չի դադարեցրել նույնիսկ այն ժամանակ, երբ ինքն ընկել է գետնին։ Այնուհետև մի տարեց կին հարձակվողներին համոզել է դադարեցնել դաժան գործողություններն ու փրկել է կնոջը։

Տուժածը պատմում է, որ ինքը չի կարողացել բժշկից ստանալ իրեն հասցված վնասվածքների մասին տեղեկանք, սակայն վերջինս նրան խորհուրդ է տվել ոստիկանություն դիմել ու բանավոր կերպով հաստատել է, որ նրա պտուղը հարձակման արդյունքում կարող է վնասված լինել։

http://www.tert.am/am/news/2016/08/03/istanbul-islamists-attack/2096392