Թուրքիայում հայ պատգամավորը բարձրաձայնել է հեղաշրջման փորձից հետո առաջացած վախի մթնոլորտում տեղի փոքրամասնությունների խնդիրների մասին

Ստամբուլից Ժողովրդահանրապետական կուսակցության ցուցակով ընտրված հայ կին պատգամավոր Սելինա Դողանը Թուրքիայի Ազգային մեծ ժողովում բարձրացրել է հեղաշրջման փորձից հետո Թուրքիայում առաջացած քաղաքական մթնոլորտում փոքրամասնությունների անապահով զգալու հարցը: Այդ մասին հաղորդում է Akunq.net-ը` վկայակոչելով թուրքական լրատվամիջոցները:

Աղբյուրի համաձայն` ԹԱՄԺ-ում եզդիների խնդիրների ուսումնասիրության վերաբերյալ առաջարկի քննարկումների շրջանակներում Սելինա Դողանը շեշտել է Թուրքիայում բոլոր փոքրամասնությունների խնդիրներին անդրադառնալու անհրաժեշտության մասին:

Հայ կին պատգամավորը նաև նշել է, թե երբ այս երկրում հետզհետե նվազող որևէ փոքրամասնության խնդիր է բարձրաձայնվում, անմիջապես բարձրացվում են «Հո՞ղ են ուզում», «Փոխհատուցու՞մ են պահանջում» տիպի հարցեր:

Սելինա Դողանը նաև հայտնել է, թե հասել է ժամանակը, որ եզդիների հետ մեկտեղ քննարկվեն նաև Թուրքիայում ապրող մյուս փոքրամասնությունների հարցերը, և ընդգծել, որ վերջիններս այստեղ ատելության թիրախ են դարձել: Դողանը, ուշադրություն հրավիրելով այն հանգամանքի վրա, որ դրան արգելք լինելու համար փոփոխություններ են անհրաժեշտ ոչ միայն օրենքներում, այլ նաև` թուրք հասարակության մտայնության մեջ, ասել է. «Նախ և առաջ, մեր ելույթների նկատմամբ պետք է մենք` քաղաքական գործիչներս, ուշադիր լինենք: Այն դեպքում, երբ իշխանավորներն ասում են` «Կներեք արտահայտությանս համար` հայ», պատկերացրեք, թե ինչ կասի կամ կմտածի հասցեատեր զանգվածը…»:

Նշենք, որ ԹԱՄԺ-ում եզդիների խնդիրների ուսումնասիրության վերաբերյալ առաջարկը մերժվել է Արդարություն և զարգացում, ինչպես նաև` Ազգայնական շարժում կուսակցության պատգամավորների պատճառով: Առաջարկին կողմ են քվեարկել միայն Ժողովրդահանրապետական և Ժողովուրդների դեմոկրատական կուսակցության պատգամավորները:

Akunq.net