Թուրքիայի նախագահ Ռեջեփ Թայիփ Էրդողանը քննադատել է ԱՄՆ զինված ուժերի կենտրոնական հրամանատարության ղեկավար, գեներալ Ջոզեֆ Վոտելի հայտարարությունը ապստամբությունից հետո թուրք զինվորականների ձերբակալությունների առթիվ: Այս մասին հաղորդում է Lenta.ru-ն` վկայակոչելով թուրքական The Hürriyet Daily News պարբերականը:
«Ամերիկացի գեներալն աջակցում է ապստամբներին: Նման հայտարարություն անելով` նա մատնել է ինքն իրեն: Իսկ արդյո՞ք դա ձեր գործն է: Ո՞վ եք դուք ընդհանրապես: Պետական հեղաշրջման փորձը կանխած երկրին շնորհակալություն հայտնելու փոխարեն դուք պաշտպանում եք դավադիրներին: Գլխավոր ապստամբը գտնվում է ձեր երկրում», – ասել է Էրդողանը` նկատի ունենալով ներկա պահին ԱՄՆ-ում բնակվող հոգևոր քարոզիչ Ֆեթուլլահ Գյուլենին:
Հուլիսի 28-ին ելույթ ունենալով անվտանգության հարցերով համաժողովում Կոլորադոյում` Վոտելը մտահոգություն է հայտնել, որ բազմաթիվ թուրք զինվորականներ, ում հետ համագործակցել է ԱՄՆ-ն, հայտնվել են ճաղերից այն կողմ:
Leave a Reply