Ինչպես տեղեկացնում է գերմանական «Deutsche Welle» հեռուստառադիոընկերությունը, Գերմանիայի Կանաչների կուսակցության համանախագահ Ջեմ Օզդեմիրը դեմ է արտահայտվել Թուրքիայի Կրոնական գործերի նախարարությանը կից հաստատությունների կողմից գերմանական դպրոցներում կրոն դասավանդելու հարցին: Մասնավորապես «Deutschlandfunk» ռադիոյին տված հարցազրույցում Ջեմ Օզդեմիրն ասել է, որ Կրոնական գործերի թուրք-իսլամական միությունը քաղաքական կազմակերպություն է, որը հրահանգներ է տալիս անմիջապես Անկարայից: Իսկ նման հաստատությունները չպետք է գերմանական դպրոցներում դասավանդեն: «Նմանատիպ կազմակերպությունները մեծ տեղ են տալիս պետական գաղափարախոսությանը, ընդունում են, որ կրոնական համայնք են և եթե մեր դպրոցներում սկսեն կրոն դասավանդել, ապա դա կնշանակի, որ մեր դպրոցների դռները բացում ենք Էրդողանի առաջ», նշել է Օզդեմիրը:
Ջեմ Օզդեմիրը նաև կարծիք է հայտնել, որ ԵՄ-ն չպետք է դադարեցնի Թուրքիայի եվրոինտեգրման բանակցությունները. ճիշտ է, ներկայիս ռեժիմը դեմ է մարդու իրավունքների և ժողովրդավարության սկզբունքներին, սակայն ԵՄ-ն պետք է ցույց տա, որ Թուրքիայում ժողովրդավարության հաղթանակի դեպքում ԵՄ-ն իր դռները չի փակի Թուրքիայի առաջ:
Akunq.net
Leave a Reply