Իրանը դադարեցրել է ավիահաղորդակցությունը Թուրքիայի հետ

Իրանի իշխանությունները որոշել են դադարեցնել ավիահաղորդակցությունը Թուրքիայի հետ՝ այդ երկրում ռազմական հեղաշրջման փորձից հետո, հաղորդում է «Reuters»-ը:

Գիշերը Թուրքիայի նախագահ Ռեջեփ Թայիփ Էրդողանը հայտնել էր երկրի օդային տարածքն ամբողջությամբ փակելու մասին, իսկ երկրի վարչապետ Բինալի Յըլդըրըմը հայտարարել էր, որ կխփեն բոլոր օդանավերը, որոնք օդ կբարձրանան առանց Թուրքիայի զինված ուժերի հրամանատարության թույլտվության:

Նշենք, որ հուլիսի 15-ի երեկոյան լրատվամիջոցները հաղորդել են Թուրքիայում ռազմական հեղաշրջման փորձի մասին: Անկարայի եւ Ստամբուլի փողոցներում ռազմական տեխնիկա է հայտնվել, տեղի են ունեցել կրակոցներ եւ պայթյուններ: Մի խումբ զինվորականներ հայտարարել են երկրում իշխանությունը վերցնելու մասին՝ սահմանադրական կարգը վերականգնելու, մարդու իրավունքներն ու ազատությունները ապահովելու նպատակով:

Թուրքիայի վարչապետ Բինալի Յըլդըրըմը հայտարարել է տեղի ունեցող իրադարձությունների անօրինական լինելու մասին: Նախագահ Ռեջեփ Թայիփ Էրդողանը հայտարարել է, որ հեղաշրջման փորձը ձախողվել է եւ ամբողջությամբ կճնշվի:

http://news.am/arm/news/337537.html