Ստամբուլում տեղի ունեցած ՅՈՒՆԵՍԿՕ-ի Մշակությաին ժառանգության կոմիտեի 40-րդ նստաշրջանում կատարված քվեարկության արդյունքում Անին ընդգրկվել է համաշխարհային մշակութային ժառանգության ցուցակի մեջ: Հիշեցնենք, որ 2012 թ. Անին ընդգրկվել էր ՅՈՒՆԵՍԿՕ-ի համաշխարհային մշակութային ժառանգության ժամանակավոր ցուցակի մեջ:
Թուրքիայի ներկայացուցիչն իր ելույթում նշել է, որ Անի անտիկ քաղաքը Թուրքիայի տարածքում գտնվող թվով 16-րդ շրջանն է, որ ընդգրկվել է ՅՈՒՆԵՍԿՕ-ի համաշխարհային մշակութային ժառանգության ցուցակի մեջ: Նա ՅՈՒՆԵՍԿՕ-ի որոշումը որակել է որպես «հանդուրժողականության, բազմազանության և երկխոսության» համար կատարված կարևոր քայլ. «Անատոլիան (Փոքր Ասիան-Ակունքի խմբ.) ոչ թե մշակույթների ու քաղաքակրթությունների գերեզման, այլ թանգարան է: Այս որոշումը հպարտություն է ներշնչում: Այսօր ապագայի վերաբերյալ հուսադրող որոշում կայացրեցինք»: Թուրքիայի ներկայացուցիչը որոշման կայացման մեջ կարևորել է Վրաստանի, Իրանի և Հայաստանի ներկայացուցիչների դերակատարությունը՝ շեշտելով, որ «քաղաքակրթությունն ու մշակույթը պետք է վեր դասել բռնությունից և տարակարծությունից»:
Այնուհետև ելույթով հանդես է եկել Հայաստանի ներկայացուցիչը՝ հայտնելով, որ այս որոշումը մեծ նշանակություն ունի Հայաստանի համար, որի պատմական արժեք ներկայացնող ժառանգությունների մեծ մասը դուրս է իր ներկայիս սահմաններից: Նա նշել է, որ միջնադարյան Հայաստանի մայրաքաղաք Անին Հայաստանի համար թանկարժեք զարդ է, այնուհետև հավելել, որ «Անին պատկանում է ոչ թե մի ազգի, այլ համայն մարդկությանը»:
Akunq.net
16.07.2016
Leave a Reply