Կնեսետի անդամ. Հայոց ցեղասպանությունը ճանաչելու ժամանակն է

Իսրայելը հետեւողականորեն եւ կանոնավորապես հրաժարվում էր գործ ունենալ Հայոց ցեղասպանությունը ճանաչել–չճանաչելու հարցի հետ: Այս մասին «The Jerusalem Post»-ում հրապարակված հոդվածում գրել է Կնեսետի պատգամավոր Նահման Շայը:

Նրա խոսքով, հետաքրքիր է այն փաստը, որ նույնիսկ վերջին տարիների ընթացքում՝ Թուրքիայի հետ հարաբերությունների վատթարացումից հետո, Իսրայելն այդպես էլ չճանաչեց ցեղասպանությունը: «Ներկայում Թուրքիայի հետ հարաբերություններում ջերմացում է նկատվում, Կնեսետի վրա ճնշումը կրկին աճում է, եւ ճանաչման ավելի քիչ հնարավորություններ կան»,- գրել է հեղինակը:

Միաժամանակ, Կնեսետի անդամը Թուրքիայի եւ Հայաստանի միջեւ հաշտեցման կոչ է արել: Նրա կարծիքով, երկու երկրների հարաբերությունների կարգավորումը վերջ կդնի անորոշությանը. «Բոլորը կհամաձայնեն, որ ցեղասպանություն է եղել, իսկ Հայաստանն ու Թուրքիան միմյանց ձեռք կսեղմեն եւ հարաբերությունները կսկսեն մաքուր էջից»:

Հոդվածի հեղինակը հիշեցրել է Իսրայելի եւ Հայաստանի կապերի մասին, որոնք բազմաթիվ տարիներ են ձգվում: «100 տարի առաջ Սառա Աարոնսոնը նկարագրել է, թե ինչպես է սեփական աչքերով տեսել հայերի դեմ թուրքերի գազանությունները: Վերադառնալով Իսրայել՝ նա եղբոր հետ ստեղծում է Նիլի՝ հրեական լրտեսական ցանց, որը բրիտանացիներին օգնում էր Օսմանյան կայսրության դեմ պայքարում: Իր հուշերում Աարոնսոնը գրել է, որ անհանգստացել է Թուրքիայի հրեական համայնքի համար, որն ի վերջո կարող է կրկնել հայերի ճակատագիրը: Դա ընդհատակյա կազմակերպություն ձեւավորելու նրանց ջանքերի շարժիչ ուժն էր»,- գրել է Շայը, որը Հայոց ցեղասպանության 100-րդ տարելիցին Հայաստան այցելած Կնեսետի պատվիրակության կազմում է եղել:

Պատգամավորն ընդգծել է, որ Իսրայելն ամբողջ ուժով փորձում է խուսափել ցեղասպանություն բառն օգտագործելուց: Իսրայելի պաշտոնյաներին հրահանգել են օգտագործել բառեր, որոնք կարտահայտեն այդ իրադարձությունների սարսափը եւ ցավակցել հայ ժողովրդին՝ չօգտագործելով ցեղասպանություն բառը:

«Հայաստան Կնեսետի պատվիրակություն ուղարկելու որոշումը կարեւոր քայլ էր ճիշտ ուղղությամբ: Փորձելով հասկանալ, թե միջազգային հարաբերություններում ի՞նչն է ավելի կարեւոր` շահերը, թե՞ արժեքները, հույս ունենանք, որ Իսրայելը կընտրի վերջինը: Հոլոքոստից 70 տարի անց եկել է ժամանակը, որպեսզի Իսրայելը պաշտոնապես ճանաչի Հայոց ցեղասպանությունը: Եկել է հաշտության ժամանակը»,- ամփոփել է հեղինակը:

http://news.am/arm/news/336122.html