«Գյավուր թաղում գյավուր չէր մնացել, հիմա թաղամասն էլ չմնաց»

Նազան Օզջան

Երբ 2015 թ. դեկտեմբերի 2-ին Դիարբեքիրի Սուր գավառում հայտարարված փողոց դուրս գալու արգելքը վերջերս մասամբ վերացվեց, սկսեցին ի հայտ գալ Սուրի կրած վնասների չափերը:

Սուր գավառում գտնվող Սուրբ Կիրակոս եկեղեցում կատարված ուսումնասիրությունները բացահայտեցին, որ վնասվել է ոչ այնքան դրսի, այլ` ներսի կողմից, եկեղեցի, որը 6 ամիս ոչ ոք չէր կարողանում տեսնել` բախումների թատերաբեմում գտնվելու պատճառով:

Դիարբեքիրում մարդու իրավունքների պաշտպանները եկեղեցին այցելելուց հետո հայտնել են, որ եկեղեցու պատերին, տանիքին և զանգակատանը խիստ լուրջ վնասներ չեն հասցվել:

Սակայն, մյուս կողմից, նրանք արձանագրել են, որ եկեղեցու բոլոր ապակիները կոտրվել են, այն օգտագործվել է որպես ռազմակայան, նստարանները պատուհաններին հենելով` պատնեշներ են ստեղծել, ներսում վառարան են սարքել, որում այրել են որոշ նստարաններ, իսկ եկեղեցու ներսը` աղբանոցի վերածել:

Մարդու իրավունքների պաշտպանները նշելով, թե հատկապես մեծ ավերածության է ենթարկվել Սուրբ Կիրակոսի այգում գտնվող փոքր եկեղեցին, նաև հայտնել են. «Թալանվել է եկեղեցու գրասենյակը, կողոպտվել` վաճառվելու նպատակով այստեղ գտնվող գրքերը, ինչպես նաև` նվերները: «Քահանայատուն» անվանվող ներքևի հարկում մի մեծ անցք է բացվել, որից կապ է հաստատվել Սուրբ Կիրակոսի կողքին գտնվող քաղդեական եկեղեցու հետ»:

Մարդու իրավունքների պաշտպանները նաև ընդգծել են, որ մեծ չափով ավերածության է ենթարկվել նաև այն փողոցը, որտեղ գտնվում է Սուրբ Կիրակոս եկեղեցին:

Նրանք հայտնելով, որ այստեղի բոլոր խանութներն ու տները քանդվել են, նախկինում նեղլիկ եղած այդ փողոցն այժմ ամբողջովին դատարկ է և վերածվել է մի բաց տարածքի, նաև շեշտել են, թե Սուրբ Կիրակոս եկեղեցուն և քաղդեական եկեղեցուն պատկանած շուրջ 25 խանութները ևս գետնին են հավասարեցվել:

Մարդու իրավունքների պաշտպանները հայտարարել են. «Հատկապես Մկրտիչ Մարկոսյանի փողոցն այլևս հարթ տարածք է, որից անգամ Մարդինքափըն է երևում: Գյավուր թաղն այլևս մի ամբողջովին դատարկ և մեծ տարածք է: Խճաքարերը հավաքվել են, բայց Յողուրթփազարը փողոցում տները դեռ կանգուն են: Գյավուր թաղում գյավուր չէր մնացել, հիմա թաղամասն էլ չմնաց»:

http://www.agos.com.tr/tr/foto-detay/529/gvuru-kalmamisti-simdi-mahallesi-de-kalmamis?page=13

Թարգմանեց Մելինե Անումյանը

Akunq.net