Պաշտոնական Անկարան արձագանքել է Ցեղասպանության մասին Հռոմի պապի հայտարարությանը

Պաշտոնական Անկարան առաջին հայտարարությունն է արել՝ կապված Հռոմի Ֆրանցիսկոս պապի կողմից` 1915 թ. Օսմանյան կայսրությունում հայերի դեմ իրականացված ոճրագործությունը Ցեղասպանություն անվանելու փաստի հետ:

Ինչպես հաղորդում է «Արմենպրես»­ը՝ վկայակոչելով թուրքական «Հյուրիեթ» պարբերականը, Թուրքիայի փոխվարչապետ Նուրեթթին Ջանիկլին «մեծ դժբախտություն» է անվանել Պապի հայտարարությունը: Նա նշել է, թե դա ցույց է տալիս «Պապական աթոռի խաչակրի գիտակցությունը»: «Դա օբյեկտիվ հայտարարություն չէր. այն իրականության հետ որևէ առերեսում չուներ, դա բոլորը գիտեն, ողջ աշխարհը գիտի»,­ ասել է Ջանիկլին:

Հռոմի սրբազան քահանայապետ Ֆրանցիսկոս պապը հունիսի 24-­ին ելույթ է ունեցել ՀՀ նախագահի նստավայրում` Նախագահ Սերժ Սարգսյանի, իշխանությունների, հասարակայնության և Երևանում հավատարմագրված դիվանագիտական կորպուսի ներկայացուցիչների հետ հանդիպման ժամանակ: Ելույթում նա, շեղվելով նախապես պատրաստած և լրատամիջոցների ներկայացուցիչներին նախօրոք բաժանած ելույթի տեքստից, կիրառել է Ցեղասպանություն եզրույթը: Մասնավորապես, Պապն իր ելույթում ասել է. «Մեծ եղեռնը, որը հարվածեց ձեր ժողովրդին և որը անչափ անհամար զոհեր պատճառեց։ Այդ ողբերգությունը, այդ ցեղասպանությունը, ցավոք, գլխավորեց անցյալ դարի անմարդկային աղետների տխուր ցուցակը, որոնք իրականացվեցին ցեղապաշտական, գաղափարախոսական և կրոնական մոլորեցնող շարժառիթներով, և որոնք մթագնեցին մարդասպանների միտքը, ովքեր նպատակադրվեցին ոչնչացնելու մինչև իսկ ամբողջ ժողովուրդներ։ Եվ ցավալի է, որ ինչպես այս, այնպես էլ այլ դեպքերում աշխարհի գերտերությունները նայում էին այլ ուղղությամբ»:

Hayernaysor.am