Թուրքական «Kanal D» հեռուստաալիքը դադարեցրել է համագործակցությունը գերմանական «ZDF» հեռուստաընկերության հետ՝ Բունդեսթագում Հայոց ցեղասպանությունը ճանաչող օրինագծի ընդունման պատրվակով:
Թուրքական «Diken.com.tr» կայքի փոխանցմամբ՝ գերմանական հեռուստաընկերությունն այս առթիվ հայտարարություն է տարածել: Հայտարարությամբ մասնավորապես ընդգծվել է, որ Հայոց ցեղասպանությունը դատապարտող բանաձևի քվեարկությունից հետո թուրքական «Kanal D»-ն բազմաթիվ բողոքներ է ստացել, ինչի պատճառով եթերից հանել է «ZDF»-ի «Logo» անվամբ մանկական հաղորդաշարը:
«ZDF»-ից տեղեկացրել են նաև, որ իրենք ստացել են նշյալ որոշումը և ցավում են, որ «Logo» -ն հեռացվել է եթերից:
Աղբյուրը ուշադրություն է հրավիրում նաև այն հանգամանքի վրա, որ հենց գերմանական «ZDF» հեռուստաալիքն էր եթեր հեռարձակել գերմանացի հումորիստ Ժան Բյոհմերմանի հակաէրդողանական ելույթներն ու «գոտկատեղից ներքև» վիրավորանքներ պարունակող բանաստեղծությունը:
Հիշեցնենք, որ հունիսի 2-ին Գերմանիայի դաշնային խորհրդարանը ձայների ճնշող մեծամասնությամբ (մեկ դեմ և մեկ ձեռնպահ) հաստատեց Հայոց ցեղասպանությունը ճանաչող բանաձևը: Բունդեսթագի այս քայլը Թուրքիայում բուռն արձագանքի և ամենաբարձր մակարդակով սպառնալիքների ու վիրավորանքների տարափի առիթ հանդիսացավ:
Ermenihaber.am
Leave a Reply