Սեփական անցեալին առերեսուելը կ՛ուժեղացնի հասարակութեանը. Բունդեսթագի փոխնախագահի յօդուածն «Ակօս»ում

Գերմանիայի Բունդեսթագի փոխնախագահ, Կանաչների կուսակցութեան պատգամաւոր Կլաուդիա Ռոթը Հայոց Ցեղասպանութեան մասին բանաձեւի շուրջ Գերմանիայի ու Թուրքիայի միջեւ շարունակուող վիճաբանութեան թեմայով Ստամբուլում լոյս տեսնող «Ակօս»ի համար յօդուած է գրել: Յօդուածը ներկայացնում ենք մասնակի կրճատումներով.

«Յունիսի 2ին Գերմանիայի խորհրդարանի կողմից «1915-1916 թուականներին հայերի եւ այլ քրիստոնեայ փոքրամասնութիւնների դէմ տեղի ունեցած ցեղասպանութեան յիշատակման մասին» բանաձեւի ընդունումը Գերմանիայի՝ իր պատմութեան կարեւոր փուլերից մէկին առերեսուելու առումով կարեւոր իրադարձութիւն էր:

Այդ ժամանակահատուածն առն-չւում է Անատոլիայում ոչ միայն հայերի, այլեւ այլ քրիստոնեայ փոքրամասնութիւնների գրեթէ ամբողջական ոչնչացման յանգեցրած յանցագործութիւնների ու աքսորի ընթացքում Գերմանիայի կայսրութեան դերակատարութեանը:

Գերմանիան Ցեղասպանութեան պլանաւորմանն ու իրագործմանն անվիճելի մասնակից է եղել, եւ դա փաստաթղթերով է ապացուցուած:

Բարոյական

Պատասխանատուութիւն

Գերմանիայի խորհրդարանի՝ ա-ռանց բացառութիւնների բոլոր կուսակցութիւնների կողմից առերեսումն ու դրանից բխող պատասխանատուութիւնից չխուսափելը բացայայտ նշան է:

Այստեղ հարցը Թուրքիային մատ-նանշելով յանցանքը կիսել տալը չէ, հակառակը, Գերմանիայի խորհրդարանը տեղի ունեցած յանցագործութիւններում իր դերակատարութիւնը բացայայտօրէն ցոյց տալ, տեղի ունեցածի անունը յստակեցնել է ցանկացել:

Ընդունելը, որ Գերմանիան յանցակից է եղել, եւ դրանից բխող պատասխանատուութիւնը ստանձ-նելը մեզ համար ոչ միայն ժողովրդավարական, այլեւ բարոյական պարտաւորութիւն է:

Դա էլ նշանակում է, որ Գերմանիան Թուրքիայի եւ Հայաստանի միջեւ հաշտեցման հարցերում մասնակցութիւն ու առաջնորդող դեր է ստանձնելու:

Այդ պատճառով է, որ Գերմանիայում մարդիկ թուրք ազգայնականների բարձրաձայն արտայայտած զայրոյթը՝ թէ՛ բանաձեւի, թէ՛ Գերմանիայի խորհրդարանի վերաբերեալ, չեն ըմբռնում:

Կեցուածքը Մտահոգիչ Է

Մեզ համար տարօրինակ եւ նոյնքան էլ անհանգստացնող է անձամբ Թուրքիայի նախագահի, կառավարութեան անդամների կողմից թուրքական արմատներով գերմանացի պատգամաւորների դէմ գիտակցուած ատելութեան սերմանումը:

Անկախ պատգամաւորների, ժողովրդավարական խորհրդարանի որոշման դէմ յարձակում գործելը քիչ է՝ մի բան էլ Թուրքիայի հասարակութեան մէջ պառակտումն աւելի են խորացնում, ինչն անգամ մինչեւ Գերմանիա է հասնում:

Պնդելը, թէ բոլոր թուրքերը համակարծիք պէտք է լինեն, «Արդարութիւն եւ զարգացում» կուսակցութիւնից տարբերուող ցանկացած ձայն թշնամական համարելը հակաժողովրդավարական է ու դէմ բազմակարծութեանը:

Սակայն երկխօսութիւնն ու ազատ կամարտայայտումը Թուրքիայում եւ թուրքական կառավարութեան մէջ էլ պէտք է հնարաւոր լինի: Մնացած ամէն ինչ Թուրքիայում մարդկանց ապագան կը փչացնի»:

Asbarez.com