Գերմանիայի խորհրդարանի կողմից Հայոց ցեղասպանության մասին բանաձևի ընդունման հարցում մեծ ներդրում ունեցած Կանաչների կուսակցության՝ թուրքական արմատներ ունեցող պատգամավոր Ջեմ Օզդեմիրին ուղղված բազմաթիվ սպառնալիքներ ու վիրավորանքներ հնչեցին Թուրքիայում, այդ թվում նաև՝ նախագահ Ռեջեփ Թայիփ Էրդողանի կողմից։
«Ակօս»-ն Օզդեմիրի հետ զրուցել է հունիսի 2-ից հետո տեղի ունեցած զարգացումների մասին։
Անդրադառնալով իր հասցեին հնչող սպառնալիքներին ու վիրավորանքներին՝ պատգամավորն ասել է. «Ասում են, չէ՞, «չկա չարիք՝ առանց բարիքի»։ Քաղաքացիությունից զրկելուց սկսած, արյան թեստ հանձնելուց վերջացրած օրեցօր ավելի աբսուրդային դարձող կոչերը, վիրավորանքներն ու արձագանքը ցեղասպանության վճիռն ու այդ ցեղասպանության մեջ Գերմանիայի պատասխանատվության հարցն ավելի քննարկվող դարձրին»։
Նա հիշեցրել է, որ Գերմանիայի խորհրդարանի որոշմանը կողմ են եղել ներկայացված բոլոր կուսակցությունները։
«Որպես ազատ ու ժողովրդավարական երկրի՝ իրավունքի ու խղճի համաձայն գործող ներկայացուցիչներ՝ իրենց կամարտահայտությունն արեցին՝ առանց այլ երկրի քմահաճույքները կամ ճնշումները հաշվի առնելու։ Խորհրդարանի ղեկավար Նորբերտ Լամերտի գլխավորությամբ բոլոր կուսակցությունները քաղաքական տարաձայնությունները մի կողմ դրեցին՝ հստակ «մեսիջ» հղելով, որ Գերմանիայի խորհրդարանն առանց քաշվելու կքննարկի ցանկացած հարց։ Հասարակությունից ստացվող դրական արձագանքն էլ կարևոր ապացույցն է այն բանի, որ այդ ձայնն արձագանք է ստացել»,-ասել է նա՝ նշելով, որ անձամբ կանցլեր Անգելա Մերկելից է՛լ ավելի ուժեղ կեցվածք, սպառնալիքներին ու վիրավորանքներին ավելի կոշտ արձագանք էր ակնկալում։
Պատասխանելով հարցին, թե իրենց դեմ սկսված արշավն ինչպե՞ս է գնահատում՝ Օզդեմիրն ասել է, որ իրենց համար նորություն էր Էրդողանի ու մամուլի կողմից կազմակերպված ձևով իրենց թիրախ դարձնելը։
«Որպես քաղաքական գործիչ, եթե անգամ երբեմն վշտացնի, քննադատություն լսելը մեր գործի բնույթն է։ Բայց, իհարկե, առօրյա գործունեությունն ու կյանքը մահվան սպառնալիքների պատճառով փոխելը հաճելի չէ։ Եթե մահվան սպառնալիքներն ու վիրավորանքները մի կողմ թողնենք, մենք՝ գերմանացի խորհրդարանականներս, ի տարբերություն Թուրքիայի մեր գործընկերների, միայն ու միայն մեր մտածածն արտահայտելու համար ոչ ձերբակալվում ենք, ոչ էլ անձեռնմխելիությունից զրկվում։ Ոչ էլ Հրանտ Դինքի ու բազմաթիվ խիզախ մարդկանց հետ պատահածի նման փողոցի մեջտեղում սպանվում ենք։ Իրականում հարգանքի են արժանի հենց նրանք, որոնք այդ դժվար պայմաններում են պայքարը շարունակում»,-ասել է նա։
Օզդեմիրը խոսել է նաև Թուրքիայում Ցեղասպանության մասին խոսելու տաբուների մասին։
«Տեղի ունեցածի մասին չի խոսվել, Ժխտողականության պնդումը ոչ միայն հայերին, այլև այդ տարածքում ապրող շատ ազգերի խոչընդոտել է խոսել իրենց ցավերի մասին։ Հիմա տեսնում եմ, որ այդ հարցում գիտելիքի մեծ բաց կա»,-ասել է նա։
Խոսելով Հայոց ցեղասպանության հարցում Գերմանիայի դերակատարության մասին՝ Օզդեմիրն ասել է. «Ավելի վաղ շատ խորհրդարաններ նման որոշումներ են կայացրել։ Գերմանիայի խորհրդարանի որոշումը, սակայն, բոլորովին այլ նշանակություն ունի։ Մենք, որպես Գերմանիայի խորհրդարան, նշում ենք, որ այն ժամանակվա Գերմանիան դիվանագետներից ու միսիոներներից ստացած տվյալներից գիտեր, որ հայերը կազմակերպված տեղահանության ու կոտորածների են ենթարկվում, սակայն չի փորձել կանխել մարդկության դեմ հանցագործությունը»։
Օզդեմիրն ընդգծել է, որ Գերմանիան առերեսվում է իր պատմությանը, բայց դրանով ո՛չ ներկայիս Թուրքիային է մեղադրում, ո՛չ էլ Գերմանիային։
«Ավելին, Հայաստանի ու Թուրքիայի միջև հարաբերությունների կարգավորման համար հնարավոր ամեն ջանք գործադրելու պատասխանատվությունն ենք ստանձնում»,-ասել է նա։
Թուրքական արմատներով պատգամավորը նշել է, որ այսուհետ ժխտման քաղաքականությունն անիմաստ է։
«Մեսիջը հստակ է՝ տեսեք, մենք ձեզ հետ էինք։ Մենք մեր պատասխանատվությունն ընդունում ենք, մեր պատմության մի մասը դարձած այդ ցավին առերեսվել ենք ուզում։ Եկե՛ք միասին դա անենք։ Վստահ եմ, որ դա Թուրքիայում էլ է արձագանք գտնելու, և Թուրքիայում ու Հայաստանում դրա համար պայքարող քաղաքացիական հասարակություններին ավելի է ուժեղացնելու։ Հետդարձի ճանապարհ չկա»,-եզրափակել է նա։
Leave a Reply