Հայոց ցեղասպանության պատասխանատուներից Ջեմալ փաշայի թոռը՝ թուրք մտավորական, լրագրող Հասան Ջեմալը, անդրադարձել է Թուրքիայի «մարդասեր պատմության» վերաբերյալ նախագահ Ռեջեփ Թայիփ Էրդողանի վերջին անհեթեթ հայտարարություններին։
Թուրքական T24 կայքի իր սյունակում Հասան Ջեմալի գրառումը ներկայացնում ենք մասնակի կրճատումներով.
«Այս օրերին Պալատի սուլթանը շատ է խոսում։ Հղիության արհեստական ընդհատման արգելքն է պաշտպանում, ասում է՝ առնվազն 3 երեխա, և ավելացնում է՝ «Աստված այդպես է կամենում»։
Հետո շարունակում է. «Մայրանալը մերժող կինը թերի կին է»։
Գերմանիայի խորհրդարանում ցեղասպանության որոշմանն «այո» ասած թուրք պատգամավորների համար «արյան թեստ» է պահանջում։ «Դա ի՞նչ թուրք է։ Արյան լաբորատոր քննություն է պետք է անցկացնել»,- ասում է նա։
Սա էլ է կարողանում ասել. «Մեր պատմությունը գթության պատմություն է, կարեկցանքի պատմություն»։
Ո՞ր մեկը գրես։ Հավանաբար, մենք աշխարհի անիծված ծառաներն ենք։
Այնպիսի պատիժ ենք կրում, որ կարծես ամեն օր ստիպված ենք լսել Էրդողանի բռնապետական անհեթեթ մեկնաբանությունները։
Այդ անհեթեթ մեկնաբանություններն էլ չեն ավարտվում։
Չգիտես՝ որտեղից սկսել։ Ուղեղում չի տեղավորվում։
Իբր մեր պատմությունը «կարեկցանքի պատմություն է»։ Էրդողանն այդպես է բարեհաճում։ Բա մի քանի տարի առաջ 1915 թվականի առումով ցավակցություն հղածն ո՞վ էր։ Քողարկված «ներողության» շուրջը պտտվողն ո՞վ էր։
Դեռ 2010 թվականին «1938 թվականին Դերսիմում 50 հազար մարդ կոտորվեց» ասողն ո՞վ էր։
Երբ դու վարչապետի աթոռին էիր, այս բառերը քո բերանից դուրս չե՞ն եկել։
Մեր «ողորմած ու կարեկից» պատմության մեջ սեպտեմբերի 6-7-ը չկա՞ (1955թ.-ի սեպտեմբերին Ստամբուլի ջարդերը, որոնց թիրախում հիմնականում հույներն էին-Tert.am), Չորումի կոտորածը չկա՞, Քահրամանմարաշի կոտորածը չկա՞, Մադըմաքի կոտորածը չկա՞։
Թե՞ այսօր Սուրում, Ջիզրեում, Նուսայբինում, Շըրնաքում, Յուքսեքովայում, Սիլվանում տեղի ունեցող ողբերգությունները մեր պատմության գթասիրտ ու կարեկցանքի էջերում են տեղ գտնելու։
Մի քիչ ազնի՛վ եղիր, ազնի՛վ։
Գիտեմ, որ մի ժամանակ այս հողերի պատմությանն այսպես չէիր նայում։
Մասնավոր զրույցներում ասում էիր, թե այս պետության հողերում ապրածների հանդեպ որքան կոպիտ, որքան դաժան են վարվել։
Վաղուց են անցել այդ օրերը։
Այժմ բռնապետության ճանապարհին ես։ Քո «բռնապետությունն» ես հիմնում։
Այսօր բերանիցդ դուրս եկող ամեն բառ տոտալիտար մտածողությանդ համահունչ է։ Դու ես որոշում, թե քանի երեխա պետք է ունենանք։ «Աստված ամենաքիչը երեք երեխա է ուզում» ասողն էլ ես դու։
Կարողանում ես հայտարարել, որ ծնել չցանկացող կինը թերի կին է։
Այո՛, սա բռնապետական գլուխ է։
Այո՛, աշխարհիկությանը դեմ գլուխ է։ Մարդու իրավունքները հաշվի չառնող գլուխ։
Այո՛, ժողովրդավարության հիմքում ընկած բազմազանությունը ժխտող մի գլուխ է։ Այդ գլուխն այդքանով էլ չի բավարարվում. ռասիզմ է տարածում. ատելություն քարոզում։
Մենք էլ ամեն Աստծո օր նստում, սուլթանի բռնապետական անհեթեթություններն ենք մեկնաբանում»։
Leave a Reply