Գերմանիան շուտ պետք է ընդուներ այդ որոշումը, քանի որ Գերմանիան Ցեղասպանության ժամանակ եղել է Օսմանյան Թուրքիայի դաշնակիցը։ «Ամերիկայի ձայնի» թուրքական ծառայության հետ զրույցում նման կարծիք է հայտնել Դիարբեքիրի հայերից Արմեն Դեմիրջյանը։
Աբդուռահիմ Զորասլանը, ով իրեն ներկայացնում է Արմեն Դեմիրջյան, Գերմանիայի խորհրդարանի կողմից Հայոց ցեղասպանությունը ճանաչող բանաձեւի ընդունումը ուշացած է համարել։ Արմեն Դեմիրջյանը նշել է, թե լավ է, որ ընդունեցին, սակայն ուշացել են։ «Դա պետք է ավելի վաղ ընդունեին, քանի որ այդ հանցանքը Գերմանիան ու Օսմանյան Թուրքիան միասին են արել։ Բայց միեւնույնն է՝ ուրախացա, գոնե իրենք առերեսվեցին անցյալի հետ։ Գուցե հետագայում դա Թուրքիայի համար էլ լավ լինի»,–ասել է Արմեն Դեմիրջյանը՝ հիշեցնելով, որ ինքը 20 տարեկանում է իմացել, որ հայ է, ու իր պապը հազիվ է փրկվել Ցեղասպանության ժամանակ։
Ցեղասպանության փրկվածներից մեկի թոռ Հադի Գյումուշն էլ շեշտել է, որ իր պապի անունը Պետրոս է եղել, ով փրկվել է մի քանի օր ծառի վրա թաքնված մնալով։ Հադի Գյումուշը շեշտել է, թե Բունդեսթագի բանաձեւում Գերմանիայի մեղսակցության կետը գոհացուցիչ է։ «Ես միշտ էլ իմացել եմ, որ Գերմանիան է եղել Օսմանյան Թուրքիայի հանցակիցը։ Այդ որոշումը շատ տեղին էր, ու մյուս երկրները պետք է օրինակ վերցնեն»,–ասել է Հադի Գյումուշը։
Leave a Reply