«Ինչպե՞ս կարող է Թուրքիան Գերմանիայի խորհրդարանի որոշումը պատմական սխալ համարել, երբ իրականում ինքն է մեծ սխալ թույլ տալիս՝ ժխտելով իր կողմից իրականացված ցեղասպանության հանցագործությունը և խուսափելով միջազգային պատասխանատվությունից պատմության և համայն մարդկության առջև»,- ասել է ցեղասպանագետ, միջազգային իրավունքի եգիպտացի պրոֆեսոր Այման Սալամանը՝ խիստ քննադատության արժանացնելով Գերմանիայի Բունդեսթագի կողմից Հայոց Ցեղասպանությունը ճանաչող բանաձևի ընդունմանն ուղղված Թուրքիայի իշխանությունների արձագանքը։ Այս մասին հայտնում է M.alwafd.org կայքը:
Պրոֆեսորը նշել է, որ Թուրքիան մոռանում է, որ առաջին Համաշխարհային պատերազմի ժամանակ Գերմանիան եղել է 20-րդ դարի առաջին ցեղասպանությունը իրագործած՝ Օսմանյան կայսրության դաշնակիցը։
«Միջազգային իրավունքի տեսանկյունից Թուրքիայի իշխանությունների արդարացումներն արժեզուրկ են, քանի որ Հայոց ցեղասպանությունը պատմական փաստ է, և 1915թ․ Օսմանյան կայսրության իշխանությունների գործած հանցագործության էությունը լիովին համապատասխանում է «Ցեղասպանության հանցագործության» մասին ՄԱԿ-ի 1948 թ. բանաձևի բնորոշումներին»,-ըստ աղբյուրի՝ ասել է Այման Սալամանը։
Panorama.am
Leave a Reply