Գերմանացի քաղաքական գործիչ Ջեմ Օզդեմիրը մահվան բազմաթիվ սպառնալիքներ է ստանում թուրք ազգայնականների կողմից: Դրա պատճառը հունիսի 2-ին Բունդեսթագի կողմից Հայոց ցեղասպանությունը դատապարտող բանաձեւի ընդունումն է:
Կանաչների առաջնորդի հասցեին սպառնալիքների քանակը հասել է այնպիսի մակարդակի, որ Քրեական գործերով դաշնային գերատեսչությունը ստիպված էր միջոցներ ձեռնարկել քաղաքական գործչի անվտանգությունն ապահովելու համար, գրում է Welt am Sonntag-ը:
«Մենք սերտ կապ ենք պահպանում անվտանգության ծառայությունների հետ: Վիրավորանքներին մենք սովոր ենք, սակայն մահվան նման մեծ քանակությամբ սպառնալիքների մենք դեռ չենք բախվել»,- ասել է քաղաքական գործչի մամուլի քարտուղար Մարկ Բերթոլդը:
«Ցավոք, կա ոչ միայն գերմանական, այլ նաեւ թուրքական Pegida (հակաիսլամական, ծայրահեղ աջակողմյան շարժում): Աջակողմյան խմբավորումներ կան նաեւ Թուրքիայում եւ գերմանաբնակ թուրքերի շրջանում»,- ասել է Օզդեմիրը՝ մեկնաբանելով իր հասցեին հնչող սպառնալիքները:
Ջեմ Օզդեմիրը Բունդեսթագում Հայոց ցեղասպանությունը դատապարտող բանաձեւի նախաձեռնողն էր: Բանաձեւի ընդունումից հետո Անկարան հետ էր կանչել Գերմանիայից իր դեսպանին, իսկ Օզդեմիրը հայտնվել էր թուրքական մամուլի քննադատությունների եւ վիրավորանքների թիրախում, փոխանցում է DW-ն:
Leave a Reply