Թուրքական մամուլի արձագանքը Բունդեսթագի կողմից Հայոց ցեղասպանության մասին բանաձևի ընդունմանը

Ձայների ճնշող մեծամասնությամբ՝ մեկ դեմ, մեկ ձեռնպահ ձայների հարաբերակցությամբ հունիսի 2-ին Գերմանիայի խորհրդարանն ընդունեց Հայոց ցեղասպանության մասին բանաձևը։ Ինչպե՞ս այն արտացոլվեց Թուրքիայում լույս տեսած թերթերի առաջին էջերին։

«Ակօս»-ը ներկայացնում է թուրքական մամուլի անդրադարձը Բունդեսթագի կայացրած որոշմանը։

Բունդեսթագի կողմից Հայոց ցեղասպանությունը, դրանում Գերմանիայի դերակատարությունը ճանաչող բանաձևը տեղ է գտել թուրքական 25 թերթերի առաջին էջերին։

Որոշ թերթեր Գերմանիայի խորհրդարանի որոշումը դատապարտել են, որոշներն էլ՝ ատելության թիրախ դարձրել։

«Հուրրիյեթ»-ի առաջին էջին «Ամո՛թ ձեզ» վերնագիրն է. նյութում նշվում է, որ Գերմանիայի կանցլեր Անգելա Մերկելը քվեարկությանը չի մասնակցել, Թուրքիայի նախագահ Ռեջեփ Թայիփ Էրդողանի հայտարարություններն առաջին պլան են մղվում։

«1915-ի միայնությունը» վերտառության ներքո «Ջումհուրրիյեթ»-ը գրում է, որ «Խորհրդարանն Էրդողանի առաջ գլուխ չխոնարհեց»։

«Միլլիյեթ»-ի վերնագրում բանաձևն «ամոթալի» է որակվում։ Ներկայացվում է Թուրքիայի արտգործնախարարության հայտարարությունը։
«Թուրքիան սա չի մոռանա» վերնագիրը «Յենի Շաֆաք» պարբերականի առաջին էջին է։ Նյութում նշվում է, որ «դեմ» քվեարկող միակ պատգամավորը Քրիստոնեա-դեմոկրատական միությունից Բերթինա Կուդլան է։ «Կանաչների» կուսակցության՝ թուրքական արմատներով համանախագահ Ջեմ Օզդեմիրն էլ որպես «ազգի խայտառակություն» թիրախ է դարձվում։

«Սթար» թերթի առաջին էջն ամենաքննարկվողն է. այստեղ Անգելա Մերկելը պատկերված է Ադոլֆ Հիտլերին բնորոշ բեղով։ «Ամեն ինչ՝ հանուն PKK-ի» ասված է վերնագրում։ Այստեղ ատելության թիրախ են դարձվել Ջեմ Օզդեմիրի գլխավորությամբ «կողմ» քվեարկած բոլոր պատգամավորներն ու Թուրքիայի խորհրդարանում դատապարտող հայտարարությունը չստորագրած քրդամետ Ժողովուրդների դեմոկրատիա կուսակցությունը։

«Բիրգյուն» թերթը գրում է. «Ցեղասպանության մասին բանաձևը հաստատվեց. ԱԶԿ-ն ասում է՝ առոչինչ է»։
«Վաթան» թերթի առաջին էջին «դեմ» քվեարկած միակ պատգամավորն է. «Միայն Բեթինան»՝ ասված է վերնագրում։

«Թարաֆ» թերթն օգտագործում է «Գերմանիայի հետ ցեղասպանության ճգնաժամը» վերնագիրը։

http://www.tert.am/am/news/2016/06/03/press/2039614