Թուրքիայում ուրախացել են, որ Բունդեսթագում մեկ պատգամավոր գոնե դեմ է քվեարկել բանաձեւին

Գերմանիայի խորհրդարանում Հայոց ցեղասպանությունը ճանաչող բանաձեւի քվեարկության ժամանակ մեկ պատգամավորի դեմ քվեարկելը Թուրքիայում հրճվանքի առիթ է դարձել։

Թուրքական մամուլում հերոսացնում են Հայոց ցեղասպանության բանաձեւին դեմ քվեարկած միակ պատգամավոր Բետինա Քուդլային։  Գրեթե բոլոր թուրքական լրատվամիջոցները առանձին անդրադարձել են Բետինա Քուդլային՝ հաշվի չառնելով այն հանգամանքը, որ Գերմանիայի խորհրդարանի բոլոր թուրքերը կողմ են քվեարկել Հայոց ցեղասպանության ճանաչման բանաձեւին։

Հիշեցնենք, որ հունիսի 2–ին Գերմանիայի խորհրդարանն ընդունեց Հայոց ցեղասպանությունը ճանաչող բանաձեւը, որտեղ նշվում է, որ Բունդեսթագը խոնարհվում է 101 տարի առաջ Օսմանյան կայսրությունում հարկադիր տեղահանության եւ ջարդերի ենթարկված հայերի եւ մյուս քրիստոնյա  փոքրամասնությունների առջեւ: Բանաձեւում նաեւ նշվում է, որ Բունդեսթագը ցավում է, որ ժամանակին Գերմանիայի կառավարությունը ոչինչ չի ձեռնարկել՝ կանգնեցնելու մարդկայնության դեմ հանցանքը, որի համար Բունդեսթագն ընդունում է Գերմանիայի պատմական պատասխանատվությունը։

http://news.am/arm/news/330332.html