Գերմանիայի քաղաքացիական-հասարակական կազմակերպության ներկայացուցիչները, մտավորականները, լրագրողները, գիտնականները և քաղաքական գործիչները հայտարարությամբ են հանդես եկել սույն թվականի հունիսի 2-ին Բունդեսթագում քննարկվելիք 1915 թ. Ցեղասպանության որոշման կապակցությամբ: Հայտարարությունը թարգմանաբար ներկայացնում ենք առանց կրճատումների.
Մենք, որպես ստորև ստորագրած Գերմանիայի քաղաքացիական-հասարակական կազմակերպության ներկայացուցիչներ, անհատներ, մտավորականներ, լրագրողներ, գիտնականներ և քաղաքական գործիչներ, ցանկանում ենք հայտարարել, որ ԱՋԱԿՑՈՒՄ ԵՆՔ Գերմանիայի խորհրդարանում քննարկվող «1915 և 1916 թթ. ՀԱՅԵՐԻ ԵՒ ՄՅՈՒՍ ՔՐԻՍՏՈՆՅԱ ՓՈՔՐԱՄԱՍՆՈՒԹՅՈՒՆՆԵՐԻ ԴԵՄ ԿԱՏԱՐՎԱԾ ՑԵՂԱՍՊԱՆՈՒԹՅԱՆ» մասին որոշման օրինականացմանը և չափազանց կարևոր համարում այդ նախագծի օրինականացումը:
Հավատում ենք, որ թեև մեծ ուշացումով, բայց և այնպես Գերմանիայի խորհրդարանի կողմից այդ որոշման ընդունումը, Գերմանիայի` որպես 1915 թ. Ցեղասպանության բուն հանցագործը և իրականացնողը եղած Օսմանյան կայսրության այն ժամանակվա ռազմական ու քաղաքական դաշնակցի` սեփական պատմական պատասխանատվության հետ առերեսումը նախադեպ կլինի Օսմանյան կայսրության ժառանգորդը եղող Թուրքիայում համառ մերժողական և ժխտողական քաղաքականությունը հաղթահարելու հարցում, այլ երկրների և հասարակությունների համար խրախուսող դեր կխաղա ցեղասպանության հանցագործությունների դեմ բողոքի ձայն բարձրացնելու առումով:
Թուրքիայի Հանրապետության պետության համառ ժխտողական քաղաքականությանն անընդհատ տուրք տալը էական արգելք է, որն ուշացնում է հանրության` պատմական և հասարակական իրողությունների հետ առերեսվելու և ապագային միտված առողջ հարաբերություններ զարգացնելու գործընթացը:
Համոզված ենք, որ այդ նախագծի օրինականացումը մի ՊԱՏՄԱԿԱՆ ՈՐՈՇՈՒՄ կլինի, որը թե կապաքինի տուժած հանրությունների վերքերը, կբավարարի արդարության պահանջները և թե հասարակությունների միջև կզարգացնի արդար, հավասար և խաղաղ երկխոսություն:
Թարգմանեց Մելինե Անումյանը
Akunq.net
Leave a Reply